«Aqtóbe» halyqaralyq áýejaıyna Shyǵystyń shynary, Keńes Odaǵynyń batyry Álııa Moldaǵulovanyń esimi berildi.
«Aqtóbe halyqaralyq áýejaıy» aksıonerlik qoǵamyna Álııa Moldaǵulovanyń esimin berý týraly qaýlyǵa Premer-Mınıstr Asqar Mamın qol qoıdy. Qaýly «Qazaqstan Respýblıkasynyń aýmaǵyndaǵy áýejaılarǵa, porttarǵa, temirjol vokzaldaryna, temirjol stansalaryna, metropolıten stansalaryna, avtovokzaldarǵa, avtostansalarǵa, fızıkalyq-geografııalyq jáne memleket menshigindegi basqa da obektilerge ataý berý, sondaı-aq olardy qaıta ataý, olardyń ataýlarynyń transkrıpsııasyn naqtylaý men ózgertý jáne memlekettik zańdy tulǵalarǵa, memleket qatysatyn zańdy tulǵalarǵa jeke adamdardyń esimin berý qaǵıdalaryn bekitý týraly» Qazaqstan Respýblıkasy Úkimetiniń 1996 jylǵy 5 naýryzdaǵy №281 qaýlysyna sáıkes shyǵaryldy. «Birneshe aı buryn Úkimetke usynys jiberilgen bolatyn. Usynysymyz qoldaý tapty. Endi Álııa Moldaǵulova atyndaǵy áýejaı jazbasy ilinedi. Bul jumys bir aı ishinde atqarylady», dedi áýejaı dırektorynyń orynbasary Ilııas Nuǵmanov.
Aqtóbe áýejaıynan kúnine 8 reıs ushady. Almaty, Nur-Sultan, Atyraý men Mańǵystaý baǵyty boıynsha ishki reıs, aıyna bir ret Mysyrǵa reıs qarastyrylǵan. Aıta keteıik, Álııa Moldaǵulova Aqtóbe oblysy, Qobda aýdany, Bulaq aýylynda Sarqulov Nurmuhammed pen Moldaǵulova Marjannyń otbasynda 1925 jyldyń 15 maýsymynda dúnıege kelgen. Qazir týǵan aýylynda Álııanyń turǵan úıiniń orny men eskertkishi hám mýzeıi bar.