«Habar» telearnasynda qazaqstandyq shoý-bıznes jáne sport salasy juldyzdarynyń qatysýymen «Dala battle» realıtı-jobasynyń tusaýkeseri ótti. Atalǵan televızııalyq shoýdyń on kezeńinde naǵyz shabandozdar qıyn tapsyrmalardy oryndap, qaýipti synaqtardan ótip, ulttyq hám halyqaralyq sport túrlerinen kúsh synasady.
«Dala battle» – bul túrli emosııalar men tosyn áreketterge toly joba. Biz Qazaqstanda birinshi ret sport pen ónersúıer qaýymyn biriktiretin realıtı-shoý uıymdastyrdyq», dedi joba avtory ári prodıýseri Meıirjan Álibek.
Aıta keteıik, munda televızııalyq shoý ǵana emes, ekstremaldy týrnır túrleri de qarastyrylǵan. Onda komanda ókilderi fızıkalyq daıyndyǵyn kórsetip, kúshtiń barlyq qatal synaqtarynan ótedi. Máselen, krossfıt, taýly aımaqta aman qalý, áskerı daıyndyq, at sporty, t.b. Jobaǵa barlyǵy 5 komanda qatysýda. Oıyn erejesi boıynsha baǵdarlamanyń ár eki bóliminen keıin bir komanda realıtı-shoýdan shyǵyp otyrady.
Baǵdarlamaǵa kıno, sport jáne óner juldyzdary qatysýda. Olardyń ishinde Arman Ospanov, Asylhan Tólepov, Dáýren Serǵazın, Arman Áshim, Aqbolat О́tebaı, Asý Almabaev, Aqjúrek Tańatarov, Táýekel Músilim, Aıdar Sháribaev, Arman Qońyr bar.