Halyqqa qyzmet kórsetý ortalyqtary arqyly elektrondy sıfrly qoltańba rásimdeýshiler sany bıyl qańtar aıynda kúrt ósti. Jyl basynan beri halyqqa qyzmet kórsetý ortalyqtary arqyly qazaqstandyqtar 270 myńnan astam ESQ rásimdegen, bul kórsetkish jeltoqsan aıymen salystyrǵanda 30 %-ǵa kóp.
Bul zeınetaqy qoryndaǵy qarjyny sheshý jáne jyl saıynǵy memlekettik qyzmetkerlerdiń deklarasııa tapsyrý ýaqytynyń bastalǵanymen baılanysty. Sıfrly qoltańbany rásimdeýshiler arasynda Almaty, Túrkistan oblysy, Nur-Sultan qalasynyń turǵyndary kóp, kósh bastap turǵan megapolıs – Almatyda 27 myń bolsa, qalǵan ekeýinde 23 myńnan qoltańba alynǵan. ESQ-ny HQO arqyly eń az rásimdegender sany Batys Qazaqstan oblysynda – 7 myń.
Memlekettik korporasııanyń tóraǵasy Ádil Kojıhovtyń aıtýynsha, ESQ-ny onlaın túrde rásimdeýge bolady. Sondyqtan pandemııa ýaqytynda halyq kóp jınalatyn jerge barýdyń qajeti joq. «Biz ár turǵynnyń densaýlyǵyna alańdaımyz. Búginde ESQ-ny úıde otyryp-aq birneshe mınýttyń ishinde rásimdeýge bolady», deıdi Á.Kojıhov.
Sondaı-aq Azamattarǵa arnalǵan úkimet ESQ kiltterin ýaqtyly jańartyp otyrýdy eskertedi. Bir jylǵa beriletin elektrondy qoltańbanyń merzimi aıaqtalýǵa taıaǵan kezde, ıaǵnı 10 kún buryn ESQ ıesine eskertpe-sms keledi. Azamattar kiltterdiń jaramdylyq merzimin Ulttyq kýálandyrýshy ortalyǵynyń pki.gov.kz saıty arqyly taǵy bir jylǵa uzarta alady. Bul da ESQ alý úshin HQO-ǵa barýdyń qajettiligin joıady.
Aıta keteıik, ESQ-ny egov.kz portaly arqyly onlaın rásimdeý múmkindigi 2020 jylǵy sáýir aıynan beri bar. Bul úshin kamerasy bar noýtbýk nemese kompıýter, jeke kýálik jáne mobıldi azamattar bazasynda tirkeý bolý qajet. Júıe azamattyń jeke basynyń málimetteri men bet-álpetin sáıkestirgennen keıin jańa ESQ-ny saqtap alýdy usynady.