Qaraǵandy oblysynyń barlyq aýmaǵynda 23 qańtardan bastap karantındik shekteýler kúsheıtiletin boldy. Bul týraly kenshiler qalasynda ótken brıfıngte óńirdiń bas memlekettik sanıtarlyq dárigeri Iýrıı Zalygın málimdedi.
– Osy jyldyń qańtar aıynda óńirde koronavırýs ınfeksııasymen syrqattanýshylyqtyń 44%-ǵa nemese ótken aıdyń sáıkes kezeńimen salystyrǵanda 1,4 ese ósýi baıqalady. 18 qańtardan bastap Qaraǵandy oblysy «sary aımaqqa» endi. Osyǵan baılanysty birqatar shekteý sharalaryn engizý týraly sheshim qabyldandy, – dep atap ótti ol.
Naqtyraq aıtqanda, atalǵan kúnnen bastap oblystaǵy aýdany 2 myń sharshy metrden asatyn saýda ortalyqtarynyń jumys isteýine tyıym salynady, demalys kúnderi qalaaralyq avtobýstardyń qozǵalysy toqtatyldy.
Sondaı-aq halyqqa qyzmet kórsetý ortalyqtarynyń, bankterdiń jáne «Qazposhta» bólimsheleri aldyn ala jazylý boıynsha jumys istep, jumys kúnin 18.00-ge deıin qysqartady. Bul jerlerde áleýmettik qashyqtyq, maska rejimi, termometrııa saqtalyp, sanıtarlyq-dezınfeksııalyq tártip talaptary kúsheıtiledi. Al 15 jáne odan da kóp qyzmetkerleri bar uıymdar men mekemeler shtatynyń 60%-y qashyqtan jumys isteıtin bolady.
Mádenıet nysandary men kınoteatrlar qyzmeti tolymdylyǵy 20%-dan aspaıtyn jaǵdaıda ǵana jumys isteýge quqyly. Qoǵamdyq tamaqtandyrý oryndarynyń mereke jáne demalys kúnderi jumys isteý rejimi saǵat 07.00-den 22.00-ge deıin shekteledi. Ondaǵy kelýshilerge toltyrylý 50%-dan aspaýy tıis. Al tamaqty ózimen alyp ketý jáne jetkizý ýaqyty shektelmeıdi. Sonymen qatar jumys kúnderi saýnalar, monshalar, SPA jáne massaj salondary 09.00-den 20.00-ge deıin jumys isteıtin bolady.
Sodan soń jasy 65-ten asqan egde adamdarǵa asa qajettiligi bolmasa, úıden shyǵýdan tartyna turý usynylǵan.
Brıfıngtiń sońynda óńirdiń bas memlekettik sanıtarlyq dárigeri maska rejimi qatań saqtalsa aýrýdyń aldyn alý múmkindigin eki, tipti úsh esege deıin arttyratynyn eske saldy. «Koronavırýs keseliniń aldyn alý kóbinese ózimizge baılanysty», dep túıdi sózin Iý.Zalygın.
Qaraǵandy oblysy