Búgin tań ata aralas jekpe-jekten Ábý-Dabıde ótken UFC 257 týrnırinde asa jeńil salmaqta kúsh synasqan qazaq sportshysy Jalǵas Jumaǵulov shvesııalyq Ámir Albazıdan upaı sanymen utyldy.
32 jastaǵy Jalǵas úshin bul UFC-degi ekinshi kezdesýi edi. Tusaýkeser kezdesýin ol osydan jarty jyl buryn ótkizip, brazılııalyq Raýlıan Paıvaǵa ese jiberdi. Barlyǵy 18 márte oktagonǵa shyǵyp, 13 básekede basym túsken saqa sportshymyz bul joly Ámir Albazımen kúsh synasty. 27 jastaǵy qarsylasy Shvesııanyń týy astynda óner kórsetkenimen, Irakta dúnıege kelgen. Osy kúnge deıin ol 15 kezdesý ótkizip, tek bireýinde ǵana utyldy. Báseke basynan aıaǵyna deıin bir tempte ótti. Birde Jumaǵulov, birde Albazı shıraq qımyldady. Desek te sońǵy raýndta Ámir Jalǵasty jyǵyp alyp, qylqyndyrý tásilin oryndaýǵa talpyndy. Qandasymyz oǵan ondaı múmkindik bermedi. Sońǵy mınýtta qos sportshy tik turyp aıqasty. Jekpe-jek aıaqtalǵannan soń barlyq úsh tóreshi biraýyzdan Skandınavııa túbeginen kelgen sańlaqty jeńimpaz dep tanydy.
Al aıtýly jarystyń basty jekpe-jegi ırlandııalyq Konor Makgregor men amerıkalyq Dastın Pore arasynda ótti. Ekinshi raýnda soqqylar almasý barysynda AQSh-tyń ókili atyshýly qarsylasyn dál ıekten uryp, esinen tandyrdy.