Keshe Qasym-Jomart Toqaevtyń tóraǵalyq etýimen bolǵan Parlament Senaty bıýrosynyń otyrysynda palatanyń aldaǵy 21 sáýirde bolatyn kezekti jalpy otyrysynyń kún tártibin qalyptastyrý týraly turaqty komıtetterdiń usynystary qaraldy, dep habarlady Senattyń baspasóz qyzmeti.
Depýtattar otyrysta “Jer qoınaýy jáne jer qoınaýyn paıdalaný týraly” zań jobasyn qaraıdy. Sondaı-aq “Qazaqstan Respýblıkasynyń keıbir zańnamalyq aktilerine transferttik baǵa belgileý jáne salyq salý máseleleri boıynsha ózgerister men tolyqtyrýlar engizý týraly” zań jobasy birinshi oqylymda, “Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly” zań jobasy ekinshi oqylymda talqylanatyn boldy.
Bıýro otyrysynda EQYU Parlamenttik Assambleıasynyń Prezıdenti J.Soareshtiń Qyrǵyzstandaǵy jaǵdaıdy baıqaý jónindegi Arnaıy ókili Ádil Ahmetovtiń aqparaty tyńdaldy.
Senat depýtaty Á.Ahmetov EQYU Is basyndaǵy tóraǵasynyń Arnaıy ýákili Jánibek Káribjanovpen birge osy elge baryp, ýaqytsha úkimet basshylarymen, taratylǵan parlament depýtattarymen, belgili qoǵam qaıratkerlerimen, úkimettik emes uıymdardyń, Qyrǵyz Respýblıkasynda tirkelgen dıplomatııalyq mıssııalardyń, halyqaralyq qarjy uıymdary men ınstıtýttarynyń ókilderimen kezdesýler ótkizgen bolatyn.