Atyraýda Whatsapp messendjeri arqyly vırýsqa qarsy jáne dene qyzýyn túsiretin túrli preperat dárihanalardan alynyp jatyr degen aqparat taraǵan bolatyn. Bul derekti oblystyq densaýlyq basqarmasy medısınalyq kómekti uıymdastyrý jáne lısenzııalaý bóliminiń basshysy Nına Ospanova joqqa shyǵaryp otyr.
«Áleýmettik jelide taralǵan aqparat jalǵan. Kerisinshe, óńirde koronavırýs ınfeksııasynyń kún sanap kóbeıýine baılanysty indettiń aldyn alý sharalaryn qatańdatý kezinde dárilik qordy qaıta qaraý, tolyqtyrý jumystary júrgizilýde» deıdi Nına Ospanova.
Onyń aıtýynsha, qazir oblysta jeke qorǵanysh quraldary men dárilik zattardyń eki aılyq qory saqtaýly tur. Onyń ishinde vırýsqa qarsy ambýlatorııalyq jaǵdaıda em qabyldaýǵa arnalǵan 189 myńǵa jýyq medısınalyq preperat pen ınfeksııalyq stasıonarlarda 1 mıllıonǵa jýyq dárilik zat bar.