Otandyq QazCovid-in vaksınasyn ázirleý barysynda jyldar boıy jaqsy nátıje berip kelgen tehnologııa qoldanyldy. Vaksınanyń barlyq quramdas bóligi basqa da vaksınalardy ázirleý kezinde paıdalanylyp keledi, sondyqtan senimdi komponentterden turady.
Inaktıvti vaksınanyń platformasy qaýipsiz bolyp sanalady. Halyqtyń kópshiligi vaksınanyń quramyndaǵy komponentterdi basqa da vaksınalar arqyly buǵan deıin de qabyldaǵan. QazCovid-in preparatyn ázirleý barysynda paıdalanylǵan jalǵyz jańa komponent – belsendi emes vırýs.
«Inaktıvti vaksınany daıyndaý tehnologııasy qarapaıym. Bul basqa vaksınalarǵa qaraǵanda qaýipsiz ári tıimdi áser etedi. Vaksınany egý nátıjesinde myqty ımmýnıtet qalyptasady. Mysaly, aýyryp, keıin saýyqqan adamda paıda bolatyn ımmýnıtetpen salystyrýǵa bolady. Inaktıvti vaksınany daıyndaý úshin paıdalanylǵan komponentterdiń basym bóligi ondaǵan jyldar boıy ǵylymı turǵyda paıdalanylyp keledi. Onyń zııany bolmaǵan. Sondyqtan biz QazCovid-in ázirleý úshin vaksınanyń ınaktıvti túrin tańdadyq», dedi Bıologııalyq qaýipsizdik ǵylymı-zertteý ınstıtýtynyń jetekshi ǵalymy, vırýsolog, doktor, professor Lespek Kutymbetov.
Buǵan deıin vaksınany ázirlegen ǵalymdar, Bilim jáne ǵylym mınıstri Ashat Aımaǵambetov, Qazaqstan Respýblıkasy Prezıdentiniń kómekshisi Erlan Qarın, Jambyl oblysynyń ákimi Berdibek Saparbaev jáne S.Asfendııarov atyndaǵy Qazaq ulttyq medısına ýnıversıtetiniń rektory Talǵat Nurǵojın klınıkalyq zertteýlerden tys, erikti túrde otandyq vaksınany saldyrǵan bolatyn.