Almaty qalasynyń ákimi B. Saǵyntaev óziniń Instagram-daǵy paraqshasynda Zerdeli yqshamaýdanynyń turǵyndaryn tolǵandyrǵan másele nazardan tys qalmaǵandyǵy týraly jazdy, dep habarlaıdy Egemen.kz.
«QazQSǴZI mamandarynyń qorytyndysy boıynsha 2020 jyly 7 úıdiń irgetasy nyǵaıtyldy. Bıyl 10 úıdi nyǵaıtý josparlanýda. Barlyq jumysty onyń tehnologııasy, qurylys normasy men talaptaryn saqtaı otyryp júrgizýdi tapsyrdym. Budan keıin 13 aýlanyń qasbeti retke keltirilip, balalarǵa arnalǵan oıyn men sport alańdary, oryndyqtar men jaryq júıesi ornatylady», dep habarlady B. Saǵyntaev jáne Nurkent yqshamaýdanynlaǵy 18 úıdiń qasbetiniń jańarǵandyǵyn, 5 aýlany jóndeý josparda turǵanyn da aıtty.
Qala ákiminiń aıtýynsha, turǵyndardyń ótinishimen aýla men úı mańyndaǵy aımaqty retke keltirý máselesi sheshimin tabatyn bolady. Zerdelide turǵyn úılerge janasyp jatqan 8 jer telimi alynady.
«Sondaı-aq Nurkent yqshamaýdanynda 43 pen 72 úıdiń arasyndaǵy jer telimine bıik úı turǵyzbaq bolǵan menshik ıesinen bul jer tárkilendi. Atalǵan jerde balabaqsha boı kóteredi», - dep atap ótti B. Saǵyntaev.
Ákim jumys sapary kezinde Alataý aýdanynda «Nurly jer» baǵdarlamasy aıasynda salynyp jatqan «Alataý sıtı» turǵyn úı kesheninde boldy. Sondaı-aq Túrksib aýdanyndaǵy Qaırat yqshamaýdanynda ornalasqan TK qurylys alańdaryn aralady. Munda 1,5 myń oqýshyǵa arnalǵan mektep, 280 oryndy balabaqsha men 500 kelýshige arnalǵan emhana qurylysy qarastyrylǵan. Keshendi qurylys jumystarynyń arqasynda turǵyndar qajetti áleýmettik nysandarmen qamtamasyz etiledi.