Qazaqstandyqtar máıitterge arnalǵan qoraptarǵa salynǵan qaptar qoımasyn kórsetilgen vıdeony talqylaýda. Paıdalanýshylardyń pikirinshe, bul ónim COVID-19 vaksınasyn alǵandarǵa arnalǵan. Biraq – bul jalǵan aqparat, dep habarlaıdy stopfake.kz.
Vıdeony jelige @_TheCoolTwin laqap atymen tirkelgen paıdalanýshy júktegen. Kadrlarda Amazon kompanııasyna tıesili qoıma qyzmetkeri júzdegen qorap salynǵan paletterdi kórsetedi. Olardyń keıbirinde ishinde máıitterge arnalǵan qaptar bar degen jazý jazylǵan. Sodan keıin qoraptardyń bir bóligi FedEx jetkizý qyzmetiniń logotıpi bar júk kóligi alyp ketedi. AQSh-ta qaıtys bolǵandardyń denelerine arnalǵan sómkelerge degen suranystyń artýy vaksınasııamen emes, COVID-19-dan kóz jumý jaǵdaılarynyń artýymen baılanysty.
Qazirgi kezde Qazaqstanda segiz óńirde COVID-19 juqtyrǵan naýqastar sany artqany baıqalady. Muny vaksınasııamen baılanystyrý múmkin emes, óıtkeni ol elimizde tek 1 aqpanda bastalady. COVID-19 qarsy vaksına ólimge ákelýi múmkin degen pikirler negizsiz. Preparattardyń qaýipsizdigi men tıimdiligi klınıkalyq zertteýlermen dáleldengen.
Sondaı-aq, vıdeoda da, onyń sıpattamasynda da daıyndalǵan qaptardyń qansha aýrýhanaǵa, qalaǵa jáne elderge arnalǵany aıtylmaǵan.
Qoımadan taýarlar álemniń ártúrli núktelerine jiberilýi múmkin, sondyqtan taýarlar sanynyń kóp bolýy oıǵa qonymdy. Vıdeoda túsirilgen qoıma tıesili Amazon kompanııasynyń resmı ókilderi vıdeoǵa qatysty pikirlerin áli bildirmedi jáne osy taqyryp boıynsha túsinikteme bergen joq.