Búgin Shymkent qalasynyń ákimi Murat Áıtenovtiń qatysýymen Eńbekshi aýdany ákiminiń 2020 jylda atqarylǵan jumystar jóninde halyqqa esep berý kezdesýi ótti. Karantın jaǵdaıyna baılanysty esepti jıyn onlaın formatta uıymdastyryldy, dep habarlaıdy Egemen.kz
Turǵyndar aýdan ákimine óz saýaldaryn baılanys telefony men «Facebook», «Instagram» áleýmettik jelileri arqyly joldady. Turǵyndar men BAQ ókilderi tarapynan 30-ǵa jýyq suraq qoıyldy. Suraqtardyń deni qoǵamdyq kólik, ınfraqurylym, qaýipsizdik, mektep pen jol qurylysy máseleleri boldy.
Kelip túsken suraqtarǵa qala ákimi de birlese jaýap berip, aýdandaǵy ózekti máseleler men aldaǵy ýaqytta atqarylar jumystar jóninde aıtyp ótti.
– Qalada jolaýshylarǵa qyzmet kórsetýdiń sapasyn jaqsartý maqsatynda qoǵamdyq kólikterge reforma jasadyq. Qazir shalǵaı eldi meken turǵyndary qoǵamdyq kólikke qosymsha kólik júrgizýdi surap otyr. Sáýir aıyna deıin avtobýstarǵa arnalǵan gaz quıý beketiniń qurylysy aıaqtalyp, paıdalanýǵa berilgennen keıin 440 jańa avtobýs túrli baǵytta qyzmet kórsetedi. Sonymen qatar, qoǵamdyq kóliktiń qaıda kele jatqany týraly aqparat beretin mobıldi qosymshany iske qosýdy josparlap otyrmyz, – dedi qala ákimi.
Qazirgi tańda Eńbekshi aýdanynda qoǵamdyq kóliktiń 21 baǵyty bar. Sonyń 13-i sýbsıdııalanǵan. Qalada qoǵamdyq kólikti damytýdyń keshendi shemasyna sáıkes gaz quıý beketi iske qosylǵannan keıin 15 baǵytta 78 avtobýs qosylady.