29 qańtarda «Astana Balet» teatrynyń sahnasynda dúnıejúzine áıgili baletterdiń biri – aty máshhúr kompozıtor Petr Chaıkovskııdiń mýzykasyna qoıylǵan «Shelkýnchık» kórsetildi, dep habarlaıdy Egemen.kz
Bul keshte basty partııalardy Marıınskıı teatrynyń ártisteri – prıma-balerına Oksana Skorık pen solıst Evgenıı Konovalov oryndady. Astanalyq kórermen Sankt-Peterbordan kelgen meımandardy jyly qabyldap, qoıylym aıaqtalǵan soń qoshemetin aıamady.
«Repertýardaǵy spektaklderge shet eldik ártisterdiń qatysýy – kez-kelgen teatrdyń tájirıbesinde bar. Birinshiden, kórermenderimiz aty ańyzǵa aınalǵan Marıınskıı teatry ártisteriniń sahnadaǵy oıynyn tamashalasyn, olardyń óneri kóz qýanyshyna aınalsyn degen oı. Sebebi, bul spektakldi Vasılıı Vaınonen 1934 jyly osy teatrda qoıǵan. Osy qoıylymnyń nusqasy «Astana Balet» teatrynda da qoıylǵan», dep atap ótti «Astana Balet» teatrynyń kórkemdik jetekshisi, RF eńbek sińirgen ártisi Nurlan Kanetov.
Marıınskıı teatrynyń ǵalamat solıstteri – Oksana Skorık pen Evgenıı Konovalov, klassıkalyq bıshiler. Áıgili balet mektebiniń dástúrin saqtap kele jatqan olar, Mashenka men Shelkýnchık partııasynda joǵarǵy sheberlik deńgeıi men sahnalyq harızmasyn tanytty.
Evgenıı Konovalov – elordamyzǵa alǵash kelgen eken. Ártistiń aıtýynsha, karantın kezindegi gastroldik sapar erekshe qasterli kórinedi.
«Akademııada bilim alǵan kezden «Shelkýnchıkte» bılep kelemin. Bastapqyda kordebalettegi shaǵyn partııalardy oryndap, keıin Tyshqan koroliniń partııasyn, Ispan bıin jáne t.b. oryndadym. Sosyn baryp, Hanzadany somdaı bastadym. Men úshin «Shelkýnchık» - eń súıikti klassıkalyq baletim. Ony osyndaı ádemi ári zamanaýı teatrda oryndaǵanyma erekshe qýanyshtymyn. Kórermen qaýym osy merekelik atmosferany sezinip, spektaklden lázzat alǵan shyǵar dep úmittenemin», deıdi Marıınskıı teatrynyń solısti Evgenıı Konovalov.
Úmit, jaqsylyq pen darhandyqqa toly erteginiń ǵajaıyp atmosferasyn maestro Arman Orazǵalıevtyń jetekshiligidegi sımfonııalyq orkestr týyndatyp otyrdy.
Aıta ketý kerek, 30-qańtarda Mashenka partııasyn «Astana Balet» teatrynyń jetekshi solısti, Qazaqstannyń eńbek sińirgen qaıratkeri, kórermenniń kózaıymy – Tatıana Ten oryndaıdy. Onyń sahnadaǵy seriktesin teatrdyń jetekshi solısti, daryndy ártis Súndet Sultanov somdaıdy.
Reseı halyq ártisi Altynaı Asylmuratova qoıǵan «Shelkýnchık» spektakline teatrdyń eresek ártisteri ǵana emes, Qazaq ulttyq horeografııa akademııasynyń oqýshylary da qatysady. 2017 jyly ótken premeradan keıin-aq, bul týyndy qalamyzdyń mádenı tynysynda aıtýly qubylysqa aınaldy. Muny jyl saıyn kórsetilimge bıletterdiń aldyn-ala satylyp, únemi anshlag bolýynan-aq ańǵarýǵa bolady.
«Shelkýnchık» baletin unatatyn kórermen qaýymdy qulaǵdar etip qoıaıyq, 5 – 6 aqpanda áıgili ertegini «Astana Balet» teatrynyń sahnasynan taǵy da tamashalaı alasyz. Mashenka partııasyn teatrdyń jetekshi solıstteri – Darına Qaırasheva men Anar Dúkıeva, Shelkýnchıkti – Ýeslı Karvalo men Súndet Sultanov somdaıdy.