Almaty oblysy Kegen aýdany bıylǵy jyly týrızm salasyna 1 mlrd 860 mln teńge ınvestısııa tartpaq. Osy qarjyǵa «Temirtaý» eko-aýylyn, qonaqtar qabyldaıtyn 4 úlken keshen, panto-saýyqtyrý ortalyǵyn ashýdy josparlap otyr, dep habarlaıdy Egemen.kz
Al jalpy aýdanǵa tartylatyn ınvestısııa kólemi 6,5 mlrd. teńge bolady dep boljanýda. Bul týraly búgin oblys ákimi Amandyq Batalovtyń qatysýymen ótken Kegen aýdanynyń ákimi Talǵat Baıedılovtiń onlaın formattaǵy esepti jıyny barysynda aıtyldy.
Koronavırýs indetiniń taralý qaýpine oraı jarııalanǵan shekteý sharalaryna baılanysty Kegen aýdanynyń ákimi Talǵat Baıedılov turǵyndar aldyndaǵy esepti jıynyn onlaın formatta ótkizdi. Jıynǵa oblys ákimi Amandyq Batalov qatysty. Esepti kezdesýde 2020 jylǵy aýdannyń áleýmettik-ekonomıkalyq damý qorytyndylary jáne 2021 jyldyń josparlary týraly baıandaldy.
Baıandamashy T. Baıedılovtyń aıtýynsha, aýdanda ónerkásip salasynda óndirilgen ónim kólemi 12,7 mlrd teńgeden assa, aýyl sharýashylyǵyndaǵy jalpy ónim kólemi 30,7 mlrd teńgege oryndalǵan. Mal basy da ósken. Iri qara – 51 648 basqa, jylqy – 28 645, qoı-eshki 202 640 basqa jetti. Aýyl sharýashylyǵy taýar óndirýshileri 185 mln. teńgege 62 dana ár túrli aýyl sharýashylyǵy tehnıkalaryn satyp aldy. Sonyń arqasynda egis jınaý naýqany da oıdaǵydaı ótken.
Negizgi kapıtalǵa tartylǵan ınvestısııalar kólemi 6 mlrd 110 mln teńgege oryndalyp, naqty kólem ındeksi 106,6 paıyzdy qurady. Bul jumys bıyl da jalǵasyp, birqatar ınvestjobalar mejelenip otyr.
«Talas» kooperatıvi jylyna 300 tonna sút óndiretin, jobalyq quny 420,0 mln teńge bolatyn taýarly sút fermasyn iske qosty. Búgingi kúnge Chehııa memleketinen «Semental» tuqymdy 63 bas sıyr alyp keldi. Bıyl 240,0 mln teńgege ınvestısııa tartýdy josparlap otyr. Oǵan 3 ǵımarat salyp, qural-jabdyqtar jáne 320 bas sút baǵytyndaǵy múıizdi iri qara malyn satyp ákeledi. Tuıyq aýylyndaǵy burynǵy ken orynyn «Slava Mýnaı Servıs» JShS bıyl iske qosýdy jáne qorǵasyn óndirýdi josparlaýda. Kompanııa 10 jyl ishinde Tuıyq ken ornyn ıgerýge shamamen 13 mlrd teńge ınvestısııa salýdy kózdep otyr. Qazirgi tańda barlaý jumystary tolyq aıaqtaldy. Ruqsat berý qujattary tolyq alyndy. «Kegen Mıaso Prom» JShS táýligine 10 tonna et óndiretin jobalyq quny 2,5 mlrd teńge bolatyn et óńdeý kombınatyn salsa, Qarabulaq aýyldyq okrýgi jerinde «PG Solutions» JShS jobalyq quny 110,0 mln teńge bolatyn zamanaýı týrıstik keshen salýdy qolǵa alýda. Búgingi kúnge 7,5 ga jer telimi berildi. Jalpy 2021 jyly 6,5 mlrd teńge ınvestısııa tartý josparlanýda», dedi T.Baıedilov.
Týrıstik áleýeti zor Kegen aýmaǵynda týrızm salasynyń ózine 1 mlrd 860 mln teńge ınvestısııa tartylmaq. Osy qarjyǵa «Temirtaý» eko-aýylyn, qonaqtar qabyldaıtyn 4 úlken keshen, panto-saýyqtyrý ortalyǵyn ashý josparlanǵan.
2020 jyly aýdandaǵy qurylys jumystarynyń kólemi 4 mlrd 60 mln teńgeni quraǵan. Kegen aýylynan «Nurly jer» baǵdarlamasy aıasynda jalpy quny 364,2 mln teńgege 15 turǵyn úı salynyp, kezekte turǵan ár túrli sanattaǵy otbasylaryna berildi. Al bıyl 36 turǵyn úıdiń qurylysy men ınjenerlik-kommýnıkasııalyq jelilerin júrgizýge bıýdjetten 843,5 mln teńge qaralǵan.
Osy jáne ózge de salalardyń aıaq alysy týraly habarlaǵan aýdan ákimi baıandamadan keıin áleýmettik jeli arqyly turǵyndardan túsken saýaldarǵa jaýap berdi.
Kezdesý sońynda sóz alǵan oblys ákimi Amandyq Batalov: «Qazirgi epıdemııalyq jaǵdaıǵa baılanysty sizdermen alystan tildesip, jıynǵa onlaın formatta qatysýǵa týra kelip otyr. Árıne, júzbe júz kórip, barlyq máselelerdi sol jerde erkin talqylaǵanǵa jetpeıdi. Degenmen beınebaılanys bizge aýdannyń damýy týraly esepti tyńdap, pikir almasýymyzǵa múmkindik berip otyr. Biz Kegen aýdanyna ótken jyly «Jumyspen qamtý jol kartasy» baǵdarlamasy arqyly bólingen qarjyny qosqanda 12,7 mlrd teńge bóldik. Osy qarjyǵa qanshama joldar, áleýmettik mekemeler, ınjenerlik ınfraqurylymdar jasaldy, qurylystar salyndy. Bıylǵy jyly atalǵan baǵdarlamany eseptemegende 5 mlrd, teńgeden astam qarjy qarastyryp otyrmyz. Aýdanda mal basy jaqsy qarqynmen ósip keledi. Endigi jerde sol mal ónimderin óńdeıtin kásiporyndar ashý, oǵan ınvestısııa tartý jaǵyna kóp kóńil bólý kerek. Kegen – týrıstik tartymdy aımaq. Qaıyńdy kóline aparatyn joldy bıyl tolyqtaı jasap beremiz. Sharyn, Kólsaı, Qaıyńdy tizbegi boıynsha týrıstik klaster qurýǵa nıetti kásipkerler de bar. Sol jobalar iske assa, halyqqa jańa jumys oryndary kóptep ashylady. Bıylǵy jyl – Táýelsizdiktiń 30 jyldyǵy, mereıli jyl. Osy úlken beleske elimiz tolaıym tabystarmen jetip otyr. Bıylǵy ótkiziletin sharalarǵa jastar, aqsaqaldar, basqa da sanattaǵy azamattar belsene qatysyp, jalpy bárimiz birlesip ótkizýimiz kerek. Patrıottyq baǵyttaǵy taǵylymdy sharalarǵa mán berýimiz kerek», dedi ol.
Osy jıynda aýdan turǵyndarynyń Kegen óńirine tabıǵı gaz qashan jetkiziletinin bilgisi keletini aıtyldy. Saýalǵa jaýap bergen oblys ákimi «Shelek» AGRS-inen ary qaraı Kegenge tartylatyn magıstraldy gaz qubyrynyń TEN-i daıyn ekenin, birinshi jarty jyldyqqa deıin JSQ qujaty daıyn bolsa, ekinshi jarty jyldyqta jumysty bastaýǵa múmkindik bolatynyn jetkizdi. Iаǵnı Kegen aýdanyna kógildir otyn jetkiziletin kún de alys emes. Bul rette Amandyq Batalov tıisti basqarmaǵa gazǵa qosylý qunynyń halyqqa qoljetimdi bolýyna qatysty jumystardy shıratýdy tapsyrdy.
Esepti jıyn sońynda aýdandyq ardagerler keńesiniń tóraǵasy Sabyr Dosymbekov sóz aldy. Munan soń aýdan ákiminiń esebi onlaın formatta azamattardy qabyldaýmen jalǵasty.