Halqymyz teńizdeı tereń oıly kemeńger qalamgerinen aıyrylyp otyr. Belgili jazýshy, dramatýrg, Memlekettik syılyqtyń ıegeri Ánes Saraıdyń ómirden ozǵany týraly qaraly habar bárimizdiń de janymyzǵa aýyr tıdi. Ol ádebıetshiler qaýymyna ǵana emes, barsha qazaqqa ortaq tulǵa edi.
Ánes Tólendiuly óte eńbekqor jazýshy boldy. Bul jóninde ómirlik jubaıy, jazýshy, dramatýrg, tanymal qoǵam qaıratkeri Altynshash Qaıyrjanqyzy Jaǵanova telearna jýrnalısterine bergen suhbattarynda aıtqan bolatyn.
Ánes Saraı ónegeli ǵumyr keship, sońyna orasan zor tarıhı-ádebı mura qaldyrdy. Onyń tarıhı taqyryptarǵa jazǵan kesek-kesek týyndylary halqymyz úshin asa qymbat. Ol – Aqıqat pen Ardyń júgin arqalap ótken qalamger. О́ıtkeni jazýshy qandaı shyǵarmasyn da tek qana tarıhı derekterge súıene otyryp jazǵan. Altyn Orda men Noǵaıly dáýiriniń shejiresin, qazaq halqynyń shyǵý tarıhyn jan-jaqty zerttedi. «Isataı men Mahambet», «Adaılardyń arǵy tarıhy» jáne «Edil-Jaıyq» atty trılogııasy qundy dúnıeler ekeni daýsyz.
Sabyrly da salmaqty minezimen qarapaıym ǵumyr keshken jazýshynyń eren eńbegi áli shynaıy baǵasyn alǵan joq. Kemel oıly qalamgerdiń baǵasyn keler urpaq beredi dep oılaımyn.
Biz Ánes aǵamen elordada ótken ádebı-mádenı is-sharalarda kezdesip júrdik. Sondaı-aq «Qazaqstan áıelderi» jýrnalynyń redaksııasynda júzdesip, pikir almasyp, el, jer, halyq týraly tereń oılaryna qanyqqan edik.
Baqul bolyńyz, Ánes aǵa... Qara sózdiń qadirin biletin halqyńyz barda, rýhanı murańyz ulttyq qundylyqtar tórinen oryn alatyny sózsiz.
Aıbatyr SEITAQ,
aqyn, Qazaqstan Jazýshylar jáne Jýrnalıster odaqtarynyń múshesi