Sybaılas jemqorlyqqa qarsy is-qımyl agenttiginiń janynan azamattardyń senimi men adaldyq pen parasattylyq qaǵıdalaryna beıimdiligin artyrý maqsatynda qurylǵan Aqparattyq-aǵartý shtabynyń jyldyq jumysyn qorytyndylaýǵa arnalǵan keńes ótti.
Is-sharaǵa agenttiktiń jáne aýmaqtyq departamentterdiń basshylary, jergilikti aqparattyq-aǵartý shtabtarynyń jetekshileri men qoǵam ókilderi qatysty.
Respýblıkalyq shtabtyń jetekshisi Yrza Tursynzada quramynda Myrzataı Joldasbekov, Ermek Tursynov, Ǵosman Tóleǵul sııaqty bedeldi qoǵam belsendileri bar shtabtardyń qyzmeti jemqorlyqqa múldem tózbeýshiliktiń irgetasyn qalaýǵa múmkindik bergenin atap ótti. Onyń dáleli retinde ótken jyly jasalǵan jumystardyń alǵashqy oń nátıjelerin keltirýge bolady.
Atap aıtqanda, onlaın formatta shtabtyń 400 múshesi ótkizgen 5 myńǵa jýyq is-sharamen 1,2 mln azamat qamtylǵan. Árbir is-shara ulttyq mádenıet pen babalar murasy arqyly rýhanı qundylyqtardy tárbıeleý maqsatyn kózdedi.
Sondaı-aq parasattylyq ıdeıasy men sybaılas jemqorlyqqa qarsy mádenıetti jastar arasynda halyq shyǵarmashylyǵy arqyly qalyptastyrý maqsatynda elimizdiń ár óńirinen 16 aıtys aqyny qatysqan Antikor-aıtys jáne Antikor Terme onlaın jobalary uıymdastyryldy.
Jıyn barysynda Shymkent qalasy men Aqmola, Jambyl, Qyzylorda, Túrkistan, Pavlodar jáne Shyǵys Qazaqstan oblystary shtab jetekshileriniń baıandamalary tyńdalyp, oń tájirıbeleri ózge óńirlerge úlgi etildi.
Agenttik Tóraǵasy Alık Shpekbaev aqparattyq-aǵartý shtabynyń basty maqsaty sybaılas jemqorlyqqa qarsy mádenıetti qalyptastyrý jáne parasattylyq ıdeologııasyn ilgeriletý ekendigine toqtaldy. Onyń pikirinshe, árbir óńir ǵana emes, ár aýyldyq eldi meken turǵyndarynyń boıyna sybaılas jemqorlyqqa qarsy kózqarasty jappaı sińirýi mańyzdy. Sondyqtan da aýdandyq deńgeıde de aqparattyq-aǵartý shtabtaryn uıymdastyrý qajet. Olardyń jumysyna halyq arasynda abyroıǵa ıe belsendi azamattardy, onyń ishinde jastardy jáne ádep jónindegi ýákilderdi keńinen tartý kerek.