Ulttyq akademııalyq kitaphanada Sybaılas jemqorlyqqa qarsy is-qımyl agenttigi jáne Mádenıet jáne sport mınıstrliginiń uıytqy bolýymen «Parasat joly» jobasynyń tanystyrylymy ótti.
Agenttik tóraǵasy Alık Shpekbaev, Mádenıet jáne sport mınıstri Aqtoty Raıymqulova jáne qoǵam qaıratkerleri men din ókilderi qatysqan saltanatty is-sharada eki memlekettik organ arasyndaǵy ózara yntymaqtastyq týraly memorandýmǵa qol qoıyldy.
Qujattyń basty kózdegeni – Ulttyq akademııalyq kitaphana bazasynda ashylǵan «Parasat joly» ortalyqtary arqyly parasattylyq ıdeologııasyn ilgeriletý bolyp tabylady. Jańadan iske qosylǵan joba adaldyq pen parasattylyqty, izgilik pen danalyqty, ádildik pen qamqorlyqty dáriptep, sybaılas jemqorlyqqa qarsy mádenıettiń mánin túsindirýge baǵyttalǵan. Sondaı-aq mádenıet, ádebıet jáne rýhanııatty negizge ala otyryp, keleli áńgimeler arqyly qoǵamda parasattylyq ıdeologııasyn qalyptastyrýǵa da erekshe kóńil bólinbekshi.
El astanasynda 8 qańtarda ashylǵan «Parasat joly» ortalyǵynyń óńirlik bólimsheleri qazirgi tańda Qazaqstannyń barlyq oblystyq, qalalyq jáne aýdandyq kitaphanalarynda, Almaty jáne Shymkent qalalarynda iske qosylǵan.
Elordalyq tájirıbeni aımaqtarǵa taratý maqsatynda jumystaryn bastaǵan óńirlik ortalyqtar qoǵam men óskeleń urpaqty mádenı, rýhanı aǵartý jáne tárbıeleý oshaqtary bolyp tabylady.
Ǵylymı, shyǵarmashylyq ıntellıgensııa jáne din ókilderimen tize qosyp, qoǵamda parasattylyq uǵymyn sińirýdi maqsat tutqan «Parasat joly» ortalyqtary zııaly qaýym, memlekettik jáne qoǵamdyq uıymdar ókilderi men jastar úshin ashyq dıalog alańyna aınalǵany anyq. Sebebi osy alańda tikeleı efır arqyly kópshilikke jol tartqan «Jumadaǵy júzdesý» jobasy áleýmettik jeli paıdalanýshylardyń oń pikirine ıe bolyp otyr.
Aýqymdy jobaǵa óz úlesterin qosýǵa nıet tanytqan is-sharaǵa qatysýshylar «Parasat joly» ortalyqtarynyń ıgi bastamalar men jarqyn isterdiń uıytqysy bolatynyna senim bildirdi.
Baný ÁDILJAN,
«Egemen Qazaqstan»