Premer-Mınıstr Asqar Mamın Almaty qalasyna jumys sapary barysynda qalanyń áleýmettik-ekonomıkalyq damýy máseleleri jóninde keńes ótkizdi, dep habarlaıdy Egemen.kz.
Almaty qalasynyń ákimi Baqytjan Saǵyntaev jáne onyń orynbasarlary baıandama jasady. Talqylaýǵa Premer-Mınıstrdiń birinshi orynbasary Álıhan Smaıylov, Strategııalyq josparlaý jáne reformalar agenttiginiń tóraǵasy Qaırat Kelimbetov, Ulttyq ekonomıka mınıstri Áset Erǵalıev, Energetıka mınıstri Nurlan Noǵaev, Ekologııa, geologııa jáne tabıǵı resýrstar mınıstri Maǵzum Myrzaǵalıev, Saýda jáne ıntegrasııa mınıstri Baqyt Sultanov, Densaýlyq saqtaý mınıstri Alekseı Soı, Indýstrııa jáne ınfraqurylymdyq damý birinshi vıse-mınıstri Qaıyrbek О́skenbaev, qarjy birinshi vıse-mınıstri Berik Sholpanqulov, Mádenıet jáne sport vıse-mınıstri Ǵabıdolla Ábdirahymov qatysty.
Injenerlik, kólik jáne turǵyn úı ınfraqurylymyn damytý, bilim berý jáne densaýlyq saqtaý, kásipkerlik jáne ınvestısııalar tartý, qorshaǵan ortany qorǵaý jáne Almaty qalasyn gazdandyrý máseleleri qaraldy. Almaty aglomerasııasyn damytý jáne 2020-2024 jyldarǵa arnalǵan «Jańa Almaty» keshendi josparyn iske asyrý máselelerine erekshe kóńil bólindi.
«Almaty qalasy eldiń JIО́-niń besten bir bóligin qamtamasyz ete otyryp, áleýmettik-ekonomıkalyq damý kórsetkishteri boıynsha óńirler arasynda jetekshi orynǵa ıe. Megapolıstiń odan ári aıtarlyqtaı damý áleýeti bar. Jańa jumys oryndaryn qurý, qala turǵyndarynyń ómir súrý sapasy men ál-aýqatyn arttyrý, ınfraqurylymdy jáne jalpy alǵanda, Almaty aglomerasııasynyń ekonomıkasyn damytý úshin barlyq jaǵdaıdy jasaý qajet», — dedi A. Mamın.
Úkimet basshysy barlyq josparlanǵan jobalardy ýaqytyly jáne sapaly júzege asyrýdy, sondaı-aq Almaty qalasyn odan ári damytýǵa ınvestısııalar tartýdy qamtamasyz etýdi tapsyrdy. 2020 jyldyń qorytyndysy boıynsha Almaty qalasynda ónerkásip óndirisiniń kólemi 2019 jylmen salystyrǵanda 4,6%-ǵa 1,052 trln teńgege deıin ósti, onyń ishinde óńdeý ónerkásibi 6,9%-ǵa (mashına jasaý 35,8%-ǵa, farmasevtıka 43,5%-ǵa, qaǵaz óndirý 95,6%-ǵa, jeńil ónerkásip 5 ese) artty.
Negizgi kapıtalǵa salynǵan ınvestısııalar 17,2%-ǵa 971,2 mlrd teńgege deıin ósti. Qurylys jumystarynyń kólemi 402,7 mlrd teńgeni qurady (+10,6%), 2,4 mln sharshy metrden astam turǵyn úı paıdalanýǵa berildi (+14%). 2021-2024 jyldary Almaty qalasynda 35,4 myń jańa jumys ornyn qura otyryp, jalpy quny 4,5 trln teńge bolatyn 201 ınvestısııalyq jobadan turatyn pýl quryldy. Bıyl 7 myńnan astam jumys ornyn asha otyryp, 187,9 mlrd teńgege 92 jobany iske asyrý josparlanýda.
Jumys sapary aıasynda A. Mamın Almaty qalasynyń turǵyn úı ınfraqurylymy qurylysynyń barysyn tekserdi, sondaı-aq Qazaqstan men Ortalyq Azııadaǵy asa iri «SmArt.Point» kovorkıng ortalyǵyn aralady, onda AT, qarjy tehnologııasy, onlaın-saýda, baǵdarlamalyq qamtamasyz etýdi ázirleý, kıberqaýipsizdik, blokcheın, AT-bilim berý, medıa, avtomattandyrylǵan logıstıka, jasandy zerde, robotty tehnıka jáne t. b. salalardaǵy 60-tan astam kompanııa usynylǵan.