Qazaqstan musylmandary dinı basqarmasy koronavırýsqa qarsy vaksına saldyrýǵa qatysty málimdeme jasady, dep habarlaıdy Egemen.kz basqarmanyń resmı saıtyna silteme jasap.
"Islam dininde adamnyń ómiri men densaýlyǵynan asqan qundylyq joq. Sondyqtan árbir adam óz densaýlyǵyna asa mán berýi qajet.
Alla Taǵala «Baqara» súresiniń 195-aıatynda: «О́zderińdi óz qoldaryńmen qaýip-qaterge salmańdar», – dep buıyrǵan.
Alla Elshisi (oǵan Allanyń salaýaty men sálemi bolsyn): «Emdelińder, rasynda Alla árbir dertti shıpasymen qosa jaratty», – degen.
Dana halqymyz: «Aýyryp em izdegenshe, aýyrmaıtyn jol izde», – degen. Sol úshin kez kelgen adam emdelýdiń jáne aýrýdyń aldyn alý joldaryn qarastyrýy tıis.
Arnaıy medısına mamandary qazirgi tańda álemge qaýip tóndirgen koronavırýs indetiniń aldyn alý úshin vaksınasııalaýdyń adam densaýlyǵyn saqtap qalýdyń qaýipsiz jáne tıimdi ádis ekenin aıtýda.
Al sharıǵat boıynsha zárý jaǵdaıda ekpe salýǵa bolady. Alaıda ekpe saldyrý – ár azamattyń óz erki.
Alla Taǵala halqymyzdy juqpaly indetten saqtap, naýqas jandarǵa shıpa násip etsin!", delingen basqarma habarlamasynda.