Nur-Sultan qalasynyń ákimi Altaı Kólginov Baıqońyr aýdanynyń turǵyndarymen ótken kezdesýde 2020 jyly atqarylǵan sharýalar men bıylǵa josparlanyp otyrǵan jumys jaıly qozǵap ótti, dep habarlaıdy Egemen.kz qala ákimdiginiń resmı saıtyna silteme jasap.
«Qala turǵyndarymen turaqty kezdesip, olarmen - elordany odan ári damytý jónindegi jospardy talqylaý jáne qalyptastyrý prosesine tartý mańyzdy. Qala turǵyndarynyń kópshiligi qala ómirine belsendi aralasatyny qýantady.
Búgin barlyq sanıtarııa normalaryn saqtaı otyryp, Baıqońyr aýdanynyń turǵyndarymen kezdestim. Al buǵan deıin basqa úsh aýdannyń turǵyndarymen kezdeskenmin. Pandemııaǵa qaramastan, Baıqońyr aýdanynda 2020 jyly kóp jumys júrgizildi, bıyl naqty josparlar bar», - deıdi qala ákimi.
Onyń aıtýynsha Memleket basshysy buqaralyq sportty belsendi damytýdy jáne sportpen aınalysý úshin barlyq jaǵdaıdy jasaýdy tapsyrdy. Osylaısha, aýdanda 50–den astam aýla abattandy, atap aıtqanda, 600-ge jýyq kishi arhıtektýralyq forma, 10-nan astam fýtbol alańy, 200 kóshe trenajerleri jáne birneshe basketbol alańdary ornatyldy. Sondaı-aq, 22 aýla jóndelip, 14 qoǵamdyq keńistik (saıabaqtar, skverler, býlvarlar) abattandy. Qalada "bıýdjetke qatysý" jobasyn júzege asyrýdamyz: ár turǵyn qatysyp, abattandyrý boıynsha óz jobasyn usyna alady.
«Bıyl kópshilik oryndar men jasyl aımaqtardyń sany aıtarlyqtaı ósti. Ekologııany jaqsartý jáne qala turǵyndarynyń ýaqyt ótkizýine qolaıly oryndar qurý úshin Nur-Sultandy aýqymdy kógaldandyramyz. Máselen, tek Baıqońyr aýdanynda 7 myńnan astam aǵash pen 9 myń sharshy metr gúlzar otyrǵyzyldy.
TKSh salasynda da kóptegen jumystar atqaryldy: 29 jastar turǵyn úı kesheni jáne 10 jataqhana jóndeldi. 2020 jyly aýdanda 15-ten astam apatty úı súrildi», - dep jazdy Altaı Kólginov.
Sondaı-aq, jaryqtandyrý boıynsha jumystar júrgizildi, bul osy aýdannyń 70-ten astam kóshesin, onyń ishinde turǵyn alaptaryn da qamtýǵa múmkindik berdi.
«Kezdesýde turǵyndar 70-ke jýyq másele kóterdi, olar - kóshelerdi asfalttaý, káriz tartý, TKSh jańǵyrtý jáne eski úılerdi buzý, kóshelerdi jaryqtandyrý, aýlalardy abattandyrý, áleýmettik nysandar salý, erekshe qajettilikteri bar adamdar úshin jaǵdaı jasaý jáne t.s.s. Turǵyndardyń máselesi baqylaýǵa alyndy», - dep jazdy Instagram paraqshasynda.