Búgin Mádenıet jáne sport mınıstri Aqtoty Raıymqulova onlaın formatta azamattardy jumys jáne jeke máseleleri boıynsha qabyldady, dep habarlaıdy Egemen.kz.
Mınıstrdiń qabyldaýynda bolǵan azamattardyń kótergen máselesi san-alýan.
Túrkistan oblysy, Maqtaaral aýdany, J.Nurlybaev aýyl okrýgi, Myrzatóbe eldi-mekeniniń turǵyny Ońlasyn Nazarov aýyldy jerde mádenıet úıi men sport keshenderin salý máselesi boıynsha usynystaryn aıtty. Aqtoty Raıymqulova atalǵan másele «Mádenıet týraly» Zańnyń 8-shi jáne 9-baby 7) tarmaqshasyna sáıkes jergilikti atqarýshy organnyń quzyretine jatatynyn jetkizdi.
Osy rette, Túrkistan oblysy ákimdiginiń málimetine sáıkes Maqtaaral aýdanynyń ortalyǵy Myrzakent kentindegi mádenıet úıine jergilikti bıýdjetten qarjy bólinip, kúrdeli jóndeý jumysy júrgizilip jatqanyn, nysan bıyl paıdalanýǵa beriletin aıtty.
Sonymen qatar Jambyl, Eńbekshi aýyl okrýgi aýmaǵynan jańadan mádenıet úıin salý úshin arnaıy jer telimi anyqtalyp, jergilikti bıýdjetten qarjy bólinip, jobalaý smetalyq qujattary daıyndalyp, jeke saraptama qorytyndysy alynǵanyn jetkizdi. Atalǵan nysandardyń qurylys jumysyn 2022-2023 jyldary júrgizý josparlanyp otyr.
«Ulttyq taekvon-do sporttyq federasııasy (ITF)» qoǵamdyq birlestiginiń jetekshisi Aıdos Amanjolov jergilikti sport federasııalaryn akkredıtteýge qatysty suraqtaryn qoıdy.
Mınıstr «Dene shynyqtyrý jáne sport» týraly Zańǵa saı, jergilikti sport federasııalaryn akkredıtasııalaý respýblıkalyq mańyzy bar qalalar men oblystaǵy atqarýshy organdardyń quzyrynda ekenin atap ótti.
Túrkistan oblysy, Jetisaı aýyldyq mádenıet úıinde ornalasqan mýzeıdi zańdastyrý boıynsha mádenıet úıiniń dırektory Botagóz Dildábekovanyń saýalyna qatysty Aqtoty Raıymqulova murajaıdy zańdy tulǵa retinde zańdastyrý keregin, Mınıstrlikke mýzeıdi qurý týraly kelisim hat kelgen jaǵdaıda, zańda belgilengen tártippen qarastyrylatynyn jetkizdi. Sonymen qatar bul másele jergilikti ákimdik quzyretinde bolǵandyqtan Mınıstrlik Túrkistan oblysy ákimdigine suranys hat jáne oblys ákimi О́mirzaq Shókeevtiń atyna usynys hat jiberetinin aıtty.
Osydan keıin mınıstr Qazaqstan kompozıtorlar odaǵynyń tóraǵasy Serikjan Ábdinurovtyń osy jyly odaqtyń antologııasyn shyǵarý jáne kompozıtorlar festıvalin uıymdastyrý jaıly ótinishin tyńdady. Aqtoty Raıymqulova odaq tóraǵasyna ulttyq ónerdi nasıhattaý jolyndaǵy qyzmeti úshin alǵys aıtyp, baspa isi salasyndaǵy jyldyq jospar bekitilip qoıǵanyn jáne pandemııa men elimizdegi epıdemııalogııalyq jaǵdaıǵa baılanysty barlyq is-shara ýaqytsha toqtaǵandyqtan bul ótinishti qanaǵattandyrý múmkin emestigin jetkizdi.
Sondaı-aq jeke másele boıynsha kezdesken el azamattary da tıisti jaýap aldy.