Túrkistan oblysynyń polıseıleri turǵyndy aldap, zańsyz jer satqan alaıaqty ustady, dep habarlaıdy Egemen.kz Polisia.kz saıtyna silteme jasap.
Saıram APB-na jergilikti turǵyn aryzdanyp, alaıaqtyń qurbany bolǵany jóninde habarlaıdy. Er adamnyń aıtýynsha, tanysy 2018 jyldyń mamyr aıynda segiz sottyqtan úsh jer telimin 4,5 mıllıonǵa baǵalap satqan. Alaıda aradan bir apta ótkende satylǵan úsh jer ýchaskesiniń bireýiniń qujaty durys emes, al eki jer telimi múldem basqa adamǵa tıesili bolyp shyǵady. Sodan jábirlenýshi aqshasyn qaıtarýdy talap etkenmen, kúdikti qujattaryn durystap beremin dep, ýaqyt sozyp júrgenin jetkizedi.
Atalǵan jaıt sotqa deıingi tergep-tekserýdiń biryńǵaı tizilimine tirkelip, QR QK-niń 190-babymen tirkeýge alyndy.
Aqparat alysymen qylmysty ashý men alaıaqty quryqtaý maqsatynda polıseıler birden iske kirisedi. Kúdiktiniń jeke basyn anyqtap, ony APB-na jetkizedi. Bas sharasy mindettemede. Túrkistan oblysynyń polıseıleri alaıaqtyq áreketterdi boldyrmaý úshin azamattarǵa muqııat bolýdy jáne kúmándi qyzmetterdi usynatyn beıtanys adamdarǵa artyq senim bildirmeýge keńes beredi.
Sonymen qatar tez paıda tabýǵa úmittenip, óz múlki men aqshasyn, sondaı-aq banktik esepshot kodtary men basqa da jeke aqparatty belgisiz adamdarǵa bermeńizder. Eger de siz, alaıaqtyqtyń nemese basqa da osyndaı qylmystardyń qurbany nemese kýágeri bolsańyz, tez arada polısııaǵa “102” nómirine habarlasyńyzdar.