Qazaq eli kezinde bastaryna kún týyp, jer aýyp kelgen kimderge pana bolmady?!. Qazir solardyń bári qasıetti Qazaqstannyń bosaǵasynda emes, tórinde otyr. Turmystary da eshkimdikinen kem emes.
Qyrǵyz baýyrlar da qazaqpen tóskeıde maly, tósekte basy qosylyp, quda-jekjattyǵy jarasqan jurt. Sondyqtan taıaq tastam jerdegi ashynǵan aǵaıyndardyń bılikke degen talap-tilekterin túsinip jáne Bishkektegi oryn alǵan qantógis pen tártipsizdikke qabyrǵamyz qaıysa otyryp, “ashý — dushpan, aqyl — dos” degen ata-babalar ósıetin eske aldym.
“Sabyr túbi — sary altyn”. Bassyzdyqtan góri basalqaly ispen aınalysqan kisi utady. El bıligin qolǵa alǵan tarap endi baýyrlarynyń jaǵdaıyn túzeýge tezirek kirisse eken degen de nıetimdi jasyrmaımyn.
Nege? Sebebi, irgedegi el ishinen búlinip jatqanda eshkim beıjaı qarap otyra almaıdy eken. Onyń ústine “Kórshiniń aqysy — qudaıdyń haqysy” degen de sóz bar. Meniń razy bolǵanym, osy azamattyq máselede Qazaqstan Respýblıkasynyń Prezıdenti Nursultan Nazarbaev bilikti saıasatker, adamgershiligi zor tulǵa jáne aǵaıyndy eki eldiń elgezek perzenti retinde tamasha qyrynan tanyldy. AQSh Prezıdenti Barak Obama, Reseı Prezıdenti Dmıtrıı Medvedev “úshtigi” shı shyqqan shetin saıasattyń shyrmaýynan jol taýyp, Bakıevti elden ketýge kóndirdi. Al qarsy tarapty qarsylyq jasamaýǵa shaqyrdy. Sóıtip, ýshyqqan máseleniń ar-jaq, ber-jaǵyn tereńnen oılap, keńinen pishetin sarabdal saıasatkerler ashý-yzaǵa býlyqqan taraptardyń tilin tapty.
Nursultan Nazarbaev AQSh-taǵy bedeldi jıynda júrgenine qaramastan, Qyrǵyzstandaǵy ýaqytsha úkimet basynda otyrǵandarmen jáne olardyń burynǵy basshysymen jıi sóılesip, baýyrlas halyqtyń álemdik qoǵamdastyq aldynda bedeli túspeýin oılady. Qyrǵyz aǵaıyndardyń da el bolyp, etek jaýyp ketetinine sendi.
Dana halqymyz “qolyń kótere almaıtyn shoqpardy bilegińe qystyrma” degen. Al Qazaqstan osy araaǵaıyndyq is-áreketimen-aq EQYU tóraǵasy degen qurmetti atqa laıyq ekenin dúnıe júzine dáleldedi. Elbasymyzdyń ábjil is-qımylynyń nátıjesinde qyrǵyz halqy azamattyq soǵystyń lap ete jazdap turǵan órtinen aman qaldy. Basyna is túsip jatsa da basasaýlyq tanytyp, minez kórsetken basshyny da sabasyna túsirdi. Ol Qazaqstanǵa kelgen soń el bıliginen ketetinin resmı túrde málimdedi. Týysqan elderdiń arasyndaǵy janashyrlyq, araaǵaıyndyq, mine, osyndaı janashyrlyqtan kórinedi. Bul – EQYU-ǵa tóraǵalyq etip otyrǵan Qazaqstan Respýblıkasy men onyń Elbasyn maqtanysh tutatyn alty alash úshin úlken mártebe.
“Bir ashtyqtyń bir toqtyǵy bar”. Alatoodaǵy aıyr qalpaqty aǵaıynnyń aýylynda da toı bolsa eken dep tileıik.
Baltabaı BAIDILDAEV, Qordaı aýdandyq ardagerler keńesiniń tóraǵasy.
Jambyl oblysy.