Táýelsizdiktiń 30 jyldyǵyn merekeleýge daıyndyq jónindegi memlekettik komıssııanyń otyrysynda Prezıdent Qasym-Jomart Toqaevtarıhı oqıǵaǵa ıdeologııalyq turǵydan qaraý kerektigin, mereke kezinde atqarylatyn sharalardyń deni jastarǵa arnalýy tıistigin aıtty.Osy oraıda Túrkistan óńiriniń shyǵarmashyl jastary arasynda «Táýelsizdik qarlyǵashtary» atty baıqaýdyń jarııalanýy Memleket basshysynyń málimdemesimen úndesip otyr.
Qazaqstan Jýrnalıster odaǵy men Qazaqstan Jazýshylar odaǵynyń oblystyq fılıaldarynyń uıytqy bolýymen, oblystyq qoǵamdyq damý basqarmasynyń qoldaýymen qolǵa alynǵan baıqaýdyń negizgi maqsaty – táýelsizdiktiń tuǵyryn bıiktetip, qundylyqtaryn nasıhattaý. Táýelsizdiktiń 30 jyldyǵyna oraı uıymdastyrylyp otyrǵan baıqaýǵa baılanysty ótken arnaıy brıfıngte Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı baıqaýdyń negizgi maqsaty men sharttaryna toqtaldy. «Baıqaýǵa táýelsizdik alǵan kezden bergi jyldarda dúnıege kelgen, 30 jasqa deıingi shyǵarmashyl jastar qatysa alady. Úsh janrda ótedi. Enshisi bólinbeıtin Túrkistan oblysy men Shymkent qalasynyń qolyna qalam ustaǵan talantty jastar táýelsizdikke degen júrekjardy lebizin pýblısıstıka, poezııa men proza arqyly bildire alady», dedi Ǵ.Elshibaı. Al Qazaqstan Jazýshylar odaǵy Túrkistan oblystyq fılıalynyń tóraǵasy Álibek Shegebaı baıqaýdyń ózge shyǵarmashylyq jarystardan ereksheligine toqtaldy. «Ádebı turǵydan qarasaq, keshegi ýaqytta jazylǵan shyǵarmalardyń barlyǵy derlik táýelsizdikti ańsaýmen sıpattaldy. Keńes odaǵy tusynda jazylǵan kez-kelgen shyǵarmany alyp qarasańyz, meıli proza, meıli poezııa bolsyn, túbinde azattyqqa umtylýdy ańǵarasyz. Al endi búgin táýelsiz el atanyp, 30 jyldyǵyn toılap otyrmyz. Qazirgi jastar táýelsizdikti qalaı túsinedi? Azattyqqa degen kózqarastary qandaı? Mine, osyny shyǵarmashylyq baıqaý arqyly halyqqa jetkizgimiz keledi», dedi Á.Shegebaı. Oblystyq qoǵamdyq damý basqarmasynyń basshysy Damır Júnisov baıqaý barysynda táýelsizdiktiń jemisi retindegi Túrkistannyń jańarǵan kelbeti taqyrybyna erekshe kóńil bólinetinin jetkizdi.
Úmitkerler shyǵarmalaryn 15 naýryzǵa deıin jibere alady. Baıqaý jeńimpazdaryn tanymal aqyn-jazýshy, jýrnalısterden quralǵan qazylar alqasy anyqtaıtyn bolady. Úzdik shyǵarmalar arnaıy jınaq retinde jaryq kóredi.