Dúnıejúzilik qaterli isikke qarsy kúres kúni Nur-Sultan men Almaty qalalaryndaǵy záýlim ǵımarat pen qurylysta kógildir tústi jaryq qosyldy. Elordada «Báıterek» monýmenti men «Han shatyr» saýda-oıyn-saýyq ortalyǵy, Almatyda «Halyq arena» sport jáne mádenıet saraıy, «Almaty arena» muz saraıy, Abaı atyndaǵy qazaq memlekettik akademııalyq opera jáne balet teatry, Renion Park qonaq úıleri jáne MEGA Alma-Ata saýda-oıyn-saýyq ortalyǵy Happy Eye sholý dóńgelegi kógildir tústi ot jaqty.
Aksııany Qazaq onkologııa jáne radıologııa ǵylymı-zertteý ınstıtýty (QazORǴZI), «Obyrmen birge kúres» qoǵamdyq qory jáne Takeda bıofarmasevtıka kompanııasy uıymdastyrdy. Aksııanyń basty maqsaty – qoǵamnyń nazaryn osy jahandyq problemaǵa aýdarý jáne halyqty onkologııalyq aýrýlardy erte anyqtaýǵa jáne emdeýge shaqyrý, halyqty qaterli isik týraly aqparattandyrý.
«Qazir onkologııany emdeý isi damyǵan. 10-15 jyl buryn jazylmaıdy degen dıagnozdy búginde emdeýge bolady. Álemde onkologııalyq aýrýlardy emdeýdiń ozyq ádistemeleri ıgerilip, Qazaqstanda belsendi qoldanylýda. Onyń barlyǵy TMKKK sheńberinde ár azamatqa qoljetimdi. Alaıda turaqty onkoskrınıng, sondaı-aq aýrýdy erte anyqtaý arqyly uzaq emniń aldyn alýǵa bolady», dedi «Qazaq onkologııa jáne radıologııa ǵylymı-zertteý ınstıtýty» AQ Basqarma tóraıymy Dılıara Qaıdarova.
Qazirgi ýaqytta elimizde halyqaralyq hattamalarǵa sáıkes keletin onkologııalyq aýrýlardy emdeýdiń zamanaýı túrleri júrgizilýde. Maqsatty terapııa, ımmýnoterapııa jáne gendik ınjenerııa ádisteri belsendi qoldanylady. 2010 jyldan bastap súıek kemigin transplantasııalaý júrgizilýde, 2012 jyly Qazaqstanda onkopsıhologtardyń jeke kásibı qyzmeti paıda boldy.
Mańyzdy jetistik retinde aýrýdyń satysy men taralýyn dál anyqtaýǵa, emdeýdiń ońtaıly rejimderin tańdaýǵa, jeke terapııany qoldanýǵa, radıasııalyq nemese hımıoterapııa kýrsyn taǵaıyndaýǵa, emdeý tıimdiligin baqylaýǵa jáne negizsiz operasııalardy boldyrmaýǵa kómektesetin MRT jáne PET-KT dıagnostıkasyn, molekýlalyq-genetıkalyq zertteýler men telepatologııany engizýdi aıtýǵa bolady. Jergilikti jerlerde onkologııalyq aýrýlardyń erte belgilerin anyqtaıtyn jáne anyqtalǵan aýrýlary bar pasıentterge alǵashqy kómek kórsetetin emhanalardyń qyzmetkerleri aýqymdy jumys atqarady. Onkologııalyq aýrýlarmen kúres jónindegi keshendi jospar sheńberinde qaterli isiktiń keń taraǵan túrlerimen aýyratyn naýqastarǵa úıde pallıatıvtik kómek kórsetý boıynsha mobıldi brıgadalardyń jumysy jandandyryldy.
Sonymen qatar onkologııa týraly naýqastardaǵy aqparattyń jetispeýshiligi problemasyn sheshýge ǵana emes, sondaı-aq terapııaǵa tózimdilikpen baılanysty psıhologııalyq jáne áleýmettik problemalar men máselelerdi eńserýge kómektesýge arnalǵan qazaqstandyq naýqastarǵa pasıent mektebi formatynda qoldaý baǵdarlamalary qoljetimdi bolyp otyr. Bul jumysta onkologtarǵa qoǵamdyq uıymdar men áleýmettik jaýapty bıznes baǵa jetpes kómek kórsetedi.
«Bizdiń mıssııamyz – qaterli isikpen aýyratyndardyń ómirin saqtap qalý jáne ómir sapasyn barynsha jaqsartý úshin búkil qoǵamnyń kúsh-jigeri men áleýetin biriktirý», dedi «Obyrǵa qarsy birge kúres» qoǵamdyq qorynyń atqarýshy dırektory Gúlnar Kýnırova.
Aıta ketelik, jyl saıyn elimizde 36 myńǵa jýyq adam qaterli isikke shaldyǵady. 190 myń qazaqstandyq onkologııalyq esepte tur.