ESPN telearnasynyń ınsaıderi Salvador Rodrıges qazaqstandyq boksshy Gennadıı Golovkın (41-1-1, 36 KO) men qarsylasy japon sportshysy Rıota Mýrata (16-2, 13 KO) arasyndaǵy jekpe-jektiń qaıda ótýi múmkin ekenin aıtty, dep habarlaıdy Egemen.kz.
«Bul aıqas Japonııadaǵy Tokyo Dome arenasynda ótýi múmkin», dedi Rodrıges.
Buǵan deıin ol Golovkın men Mýrata komandalary kelissózder júrgizip jatqanyn habarlaǵan bolatyn. Alaıda japon boksshysy mundaı salmaqty qarsylaspen kezdespes buryn aldymen «qyzdyrynatyn» jekpe-jek ótkizgisi keledi. Eske sala keteıik, Mýrata WBA Super nusqasy boıynsha orta salmaqta álem chempıony bolsa, Golovkın – IBF jáne IBO belbeýleriniń ıegeri.
Sonymen qatar, osy jyldyń qyrkúıeginde ótýi múmkin Gennadıı Golovkın - Saýl «Kanelo» Alvares jekpe-jekteri trılogııasynyń sońǵy bólimi týraly áńgime basylar emes. Ol úshin Golovkınniń meksıkalyq Haıme Mýngııamen jekpe-jekte sátti óner kórsetýi qajetti shart bolyp otyr. Atalǵan aıqas shamamen mamyr aıyna josparlanǵan.