19 jasar BQO Kaztalov aýdanynyń turǵyny eki jylǵa sottaldy. Ol óz balasyn paketke orap ashyq dárethanaǵa tastaǵan, dep habarlaıdy Egemen.kz
4 aqpanda №2 Kaztalov aýdandyq sotynda bul is boıynsha úkim jarııalandy. Úkimdi sot oryndaýshysy Aıvar Bıjanov jarııalady.
«Meniń qalam» basylymynyń habarlaýynsha, joǵary pedagogıkalyq kolledjdiń ekinshi kýrs stýdenti 2020 jyldyń kúzinde júkti ekenin bilgen. Biraq bul jaǵdaıdy qupııa ustaǵan.
23 qarashada qyzdyń ishi aýyra bastaıdy. Shamamen saǵat 16:00-de qyzdyń anasy dúkenge ketedi, al qalǵan otbasy músheleri bólmelerinde bolypty. Qyz dálizge shyǵa beriste bosanyp qoıady. Eseńgiregen kúıinde qaıshymen náresteniń kindigin kesip, náresteni polıetılen paketke orap, jeke úıdiń qorasynda ornalasqan dárethanaǵa tastaıdy. Osylaısha, ol jańa týǵan balasyn óltirdi. Sodan keıin ol dálizdegi qandy súrtip, bólmesine kirip jatyp qalady. Dúkennen qaıtyp kelgen anasy qyzynyń jaǵdaıyn kórip, ony jedel aýrýhanaǵa jetkizdi.
Sarapshynyń aıtýynsha, balanyń ólimine mehanıkalyq asfıksııa sebep bolǵan. Bala shamamen 8-8,5 aıynda tiri týǵan. Sottalýshy kinásin tolyq moıyndady. Qyz jigittiń bala úshin jaýapkershilik alýdan bas tartqanyn jáne ata-anasynyń reaksııasynan qoryqqanyn aıtty.
Sot úkimimen Qaztalov aýdany Jańajol aýylynyń turǵyny Qazaqstan Respýblıkasy Qylmystyq kodeksiniń 100-baby boıynsha qylmys jasaǵany úshin kináli dep tanylyp, eki jylǵa bas bostandyǵynan aıyryldy.
Aıda ORALBEK