Sheteldik saqtandyrýshylardy qazaqstandyq naryqqa jiberý jáne olardyń qyzmet etý tártibin aıqyndaıtyn zań 2021 jylǵy 2 qańtarda Qazaqstannyń DSU-ǵa kirý kezinde alǵan mindettemelerine sáıkes kúshine endi, dep habarlaıdy Egemen.kz fingramota.kz saıtyna silteme jasap.
2020 jyly qazaqstandyq saqtandyrý uıymdarynyń menshikti kapıtaly 665 mlrd teńgege deıin 20%-ǵa ulǵaıdy. Naryq turaqtylyq pen tólem qabilettiliginiń jetkilikti joǵary deńgeıimen sıpattalady. Sheteldik saqtandyrý (qaıta saqtandyrý) kompanııalarynyń Qazaqstan naryǵyna kelýi sheteldik naryqtarǵa shyǵýǵa, iri sheteldik kompanııalardyń ulttyq saqtandyrý naryǵyna qol jetkizýine jol ashady.
«Qazaqstan Respýblıkasynyń Qarjy naryǵyn retteý jáne damytý agenttigi qazaqstandyq naryqta sheteldik saqtandyrýshylardyń qyzmetin bastaýǵa ruqsat berý tártibin anyqtaıtyn bóliginde ǵana emes, sonymen qatar olardy retteý boıynsha talaptardy kúsheıtti», - dedi Tóraǵanyń orynbasary Marııa Hadjıeva.
Qazaqstan Respýblıkasynyń aýmaǵynda qarjylyq qyzmetti bastaý úshin sheteldik qarjy uıymy aldymen fılıal ashýǵa ruqsat, sodan keıin Agenttiktiń tıisti lısenzııasyn alýǵa tıis.
«Sheteldik saqtandyrý uıymdarynyń fılıaldary saqtandyrý tólemderine mindetti kepildik berý júıesiniń qatysýshylary bolýǵa jáne "Saqtandyrý tólemderine kepildik berý qory" AQ-pen qatysý sharty bolýǵa tıis. Fılıaldarmen jasalǵan sharttar boıynsha tólemderge «Saqtandyrý tólemderine kepildik berý qory» AQ qarajaty esebinen kepildik beriledi, bul fılıal jabylǵan jaǵdaıda saqtandyrýdyń kepildik berilgen synyptary sheńberinde saqtandyrý sharttary boıynsha úzdiksiz tólemderdi júzege asyrýǵa jáne saqtandyrý portfeliniń quramyna kiretin mindettemelerdi oryndaý boıynsha sabaqtastyqty qamtamasyz etýge múmkindik beredi» -, dep túsindirdi Qarjy retteýshisi tóraǵasynyń orynbasary.
Qarjylyq kórsetiletin qyzmetterdi tutynýshylardyń múddelerin qorǵaý úshin sheteldik fılıal rezerv retinde qabyldanatyn aktıvterdi qalyptastyrýy jáne olardy senimdilik deńgeıi joǵary Qazaqstannyń ekinshi deńgeıdegi bankindegi aǵymdaǵy shotqa ornalastyrýy tıis. Qazaqstan Respýblıkasynyń beırezıdent-saqtandyrý (qaıta saqtandyrý) uıymynyń jıyntyq aktıvteriniń somasy 5 mlrd AQSh dollaryna balamaly somadan tómen bolmaýǵa tıis, bul rette jumys tájirıbesi - saqtandyrýdyń barlyq salalary men synyptarynda keminde 10 jyl quraýy qajet.
Beırezıdent-saqtandyrý uıymynyń fılıaly jalpy saqtandyrý nemese ómirdi saqtandyrý salasy boıynsha saqtandyrý qyzmetin, sondaı-aq tıisti lısenzııalardy alǵan jaǵdaıda qazaqstandyq saqtandyrý kompanııalary úshin uqsas qaıta saqtandyrý jónindegi qyzmetti júzege asyra alady.
Beırezıdentter-saqtandyrý (qaıta saqtandyrý) uıymdarynyń fılıaldaryn prýdensııalyq retteý jańadan qurylatyn saqtandyrý (qaıta saqtandyrý) uıymy úshin jarǵylyq kapıtaldyń talap etiletin eń tómengi mólsheriniń ornyna RQA-nyń eń tómengi mólsherin (saqtandyrý salasyna baılanysty 1,5 mln AEK-ten 10,5 mln AEK-ke deıin) belgileýdi kózdeıdi. Qarajat Standard & Poors reıtıngtik agenttiginiń «VV+» tómen emes halyqaralyq shkalasy boıynsha eń tómen uzaq merzimdi kredıttik reıtıngi nemese Moody's Investors Service jáne Fitch halyqaralyq reıtıngtik agenttikteriniń osyǵan uqsas deńgeıdegi reıtıngi bar Qazaqstan Respýblıkasynyń ekinshi deńgeıdegi bankteriniń aǵymdaǵy shottarynda ornalastyrylady.
Beırezıdent-saqtandyrý uıymy fılıalynyń qyzmetine tekserý júrgizý kezinde Agenttik sheteldik qarjylyq qadaǵalaý organynan aqparat alýǵa quqyly. Bul rette, beırezıdent-saqtandyrý uıymy fılıalynyń qyzmetindegi táýekelder men kemshilikter anyqtalǵan jaǵdaıda, Agenttik odan aýdıt júrgizýdi talap ete alady.
«Beırezıdent-saqtandyrý uıymy sheteldik qarjylyq qadaǵalaý organynyń ruqsaty negizinde qyzmetin óz erkimen toqtata alady. Sondaı-aq, Agenttiktiń lısenzııany qaıtaryp alýyna baılanysty májbúrli túrde toqtatylady. Biraq men aıtyp ketkendeı, bul jaǵdaıda klıentterdiń qoldanystaǵy sharttary boıynsha tólemderge kepildik beriledi. Qyzmetti toqtatýǵa negiz - saqtandyrý uıymy fılıalynyń Qazaqstan Respýblıkasynyń zańnamasyn buzýy, beırezıdent-uıymdy lısenzııasynan aıyrý nemese ony taratý bolýy múmkin»- dep túıindedi M.Hadjıeva.