Májilistegi «Nur Otan» partııasy parlamenttik fraksııasynyń keńeıtilgen otyrysynda palata spıkeri Nurlan Nyǵmatýlın partııasynyń saılaý baǵdarlamasyn júzege asyrýǵa jaýaptylardy atady, dep habarlaıdy Egemen.kz.
«Jol kartasy partııamyzdyń saılaýaldy baǵdarlamasynyń maqsattaryna qol jetkizýdiń naqty joldaryn qamtıdy. Bul jerde halyqtyń barlyq sanatynyń múddesi eskerilgen. Kishisinen bastap úlkenine deıin barlyǵy qamtylyp otyr. Bul – áleýmetitk qamsyzdandyrý, densaýlyq saqtaý, bilim berý, ónerkásip, ShOB. Olardyń barlyǵynda naqty qadamdar júzege asyrylyp, balalar men áıelderge de nazar aýdarylǵan. Jol kartasynń árbir tarmaǵynyń oryndalýyna qatań baqylaý qajet», - dedi Nurlan Nyǵmatýlın.
Májilis spıkeri bul el basshylyǵynyń tapsyrmasy ekendigin aıtty.
«Biz osynaý Jol kartasynyń oryndalýyna monıtorıng pen baqylaýǵa, úılestirý men baqylaýǵa basymdyq jasaýymyz qajet. Eń aldymen úsh taraptan úılestirýshiler aıqyndalǵan. Úkimet tarapynan – Premer-Mınıstrdiń birinshi orynbasary Álıhan Smaıylov, bizdiń fraksııa tarapynan – Májilis tóraǵasynyń orynbasary, fraksııa jetekshisiniń orynbasary – Pavel Kazansev, ortalyq apparat tarapynan – partııa hatshysy Marat Sembekov. Buǵan qosa, baqylaý deńgeıler de naqty bólingen. Oryndalýynyń qazirgi mártebesine turaqty baqylaý bolady. Iаǵnı, árbir kezekti jyldyń basynda, demek aqpanda. Saılaýaldy mindettemelerdiń oryndalýy boıynsha ótken jyldyń qorytyndysy shyǵarylyp otyrady. Ár jyldyń aqpanynda, statıstıkany alǵannan keıin ony fraksııa jıynynda qarap, ótken jyldaǵy saılaýaldy baǵdarlamanyń oryndalýyn talqylaımyz. Partııamyzdyń kóshbasshysyna, jalpy Qazaqstan halqyna qandaı nátıjelerge qol jetkizilgendigi, qandaı táýekelder týyndaǵany jaıynda esep beremiz», - dedi Nurlan Nyǵmatýlın.