Bıyl qazaqtan shyqqan tuńǵysh kásibı sportshy Qajymuqan Muńaıtpasulynyń týǵanyna – 150 jyl. Atalǵan mereıtoılyq dataǵa baılanysty jýyqta Mádenıet jáne sport mınıstrligi jyl boıy atqarylatyn is-sharalar josparyn bekitti. Osy oraıda, Baıanaýyl óńirinde ómir súrgen Qajekeńniń dosy jaıly gazet oqyrmandaryn habardar etsek deımiz. Bul foto bizdiń qolymyzǵa erterekte túsken edi...
Bet-álpetinen jyly jigerdiń jeli esken, kózqarasy susty bolmasa da, tereń oıly ekeni anyq, tumsyq astyndaǵy qoıý murty qos ezýin qaptaldaı japqan, basynda jeńil bórik, kamzol ishinen óńiri kesteli, biteý jaǵaly kóılek kıgen myna sýrettegi adamnyń aty – Sýbek Qýanyshbekuly eken. Súkeń aýyl, aımaqqa tanymal sheber, usta bolypty. Bul kisi 1919 jyly Qanysh Sátbaevtiń bastamasymen Baıanaýylda ashylǵan mekteptiń ústel, oryndyq, partalaryn jasap bergeni týraly T.Orazovtyń «Qanyshtyń jastyq shaǵy» atty shaǵyn esteliginde baıandalypty.
Al Qajymuqanmen qalaı dos bolyp júr degenge kelsek, 1920 jyly 26 tamyzda Búkilreseılik Ortalyq Atqarý komıteti jáne Halyq komıssarlary Keńesi RSFSR quramynda «Qazaq Avtonomııalyq Sovettik Sosıalıstik Respýblıkasyn qurý týraly» dekrettiń qabyldanýyna bir jyl tolýyna baılanysty 1921 jyly Baıan óńirinde Q.Sátbaevtyń uıymdastyrýmen toı ótken eken. Osy merekege qurmetti qonaq retinde Qajymuqan balýan da shaqyrylǵan.
Qajekeńdi kútip alý isin Sýbek usta óz moınyna alyp, balýannyń kútimin asyryp, oıyn kórsetkende qoldanatyn temir quraldaryn da daıyndap otyrǵan. Qajekeń halyq aldyna shyǵyp keýdesine kóldeneń salǵan tasty Sýbekke urǵyzyp syndyrtqan eken. Osy oqıǵany kózimen kórgen Máshhúr-Júsip Kópeı atamyz:
...Shalqasynan jatty da,
tósep tósti,
Keýdesine qoıdyrdy úsh put tasty.
Put jarymdaı bar shyǵar
eki balǵa,
Aqbotash, Sýbek usta qandaı kúshti.
Kezek-kezek ekeýi dúrs-dúrs urdy,
Jurt qorqyp: «О́lip keter» –
deýmen turdy.
О́ziniń jany bar ma, joq pa? –
desti,
Bıt shaqqandaı kórmedi,
qyraý qurly... –
dep jazǵan eken.
Balýannyń ónerine tánti bolǵan Aqkelin, Dalba eli eki úıir jylqy syıǵa beredi. Qajekeń attanarda Sýbek dosyna: «Oljamnyń jartysyn al, ony qalamasań ónerimmen jınaǵan myna sólkebaılarymnan (medal) tańdaǵanyńdy bereıin», deıdi. Biraq Sýbek ustanyń qalaýy basqasha eken: «Qajeke mal soqsa jeldiki, aıdasa jaýdiki. Qazaqtan sizdeı ul budan keıin týar, týmas. Anaý taýdan kóterip bir úlken tas ákelip osynda ornatyp ketińiz, qaıratyńyzdyń kýási bolsyn, dostyǵymyzdyń muraty bolsyn» deıdi. Dosynyń tilegin qabyl alǵan balýan esik aldyndaǵy taýdan bir tasty kóterip ákelip úıiniń irgesine qoıyp beripti. Bul tas qazir Baıanaýyl aýdany ortalyǵyndaǵy Qanysh Sátbaev murajaıynyń aldynda tur.