Túrkistan oblysynda úsh birdeı balany qaǵyp ketip, jol-kólik oqıǵasyn jasaǵan kúdikti izdestirilýde, dep habarlaıdy Egemen.kz Polisia.kz saıtyna silteme jasap.
14 aqpan Túrkistan oblysy Jetisaı aýdanynda jasy kámeletke tolmaǵan balalardyń qatysýymen jol-kólik oqıǵasy oryn aldy. Naqtyraq aıtar bolsaq, aǵymdaǵy jyldyń 14 aqpanynda Jetisaı aýdandyq polısııa bólimine aýrýhanadan túrli dene jaraqattarymen úsh birdeı kámelet jasyna tolmaǵan balalardyń jetkizilgeni týraly habarlama kelip túsedi. Atalǵan jaıt boıynsha polıseıler birden tekserý jumystaryn júrgizdi.
Oqıǵa ornyna jedel jetken polıseıler sol kúni keshki saǵat 17:50 shamasynda Jetisaı aýdanyndaǵy S.Erýbaev kóshesi boıynda belgisiz avtokólik ońtústikten soltústik baǵytyna qaraı júrip bara jatyp, úsh jasóspirim balany soǵyp ketip, jol kólik oqıǵasyn jasaǵany anyqtaldy. Nátıjesinde úsh bala da aýrýhanaǵa jetkizilgen. Iаǵnı 16 jáne 13 jas shamasyndaǵy balalar túrli dene jaraqattarymen em qabyldasa, nebary tórt jastaǵy búldirshin aýyr dene jaraqatynyń saldarynan jansaqtaý bólimine túsip, kóz jumdy.
Atalǵan jaıt Jetisaı aýdandyq polısııa bóliminde QR QK-niń 345-baby (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) jáne kúdiktiniń oqıǵa ornyn tastap ketkeni úshin QR QK-niń 347-baby (Jol-kólik oqıǵasy bolǵan jerden ketip qalý) boıynsha sotqa deıingi tergep-tekserýdiń biryńǵaı tizilimine tirkeldi. Bul qylmysty jedel ashý maqsatynda aýdan polıseıleri kúdiktini anyqtaýǵa qatysty jedel izdestirý jumystaryn júrgizýde.
Búginde oqıǵa ornyn tııanaqty teksergen tártip saqshylary sol orynnan belgisiz avtokóliktiń artqy jaryq shamdarynyń synyqtary men aına synyqtaryn aldy. Bul zattardyń “Aýdı-100” markaly avtokóligine tıesili jáne kóliktiń túsi sur-qara (mokryı asfalt) bolýy yqtımal dep boljanýda. Sondyqtan osy boljamǵa sáıkes Jetisaı aýdanyndaǵy “Aýdı-100” markaly avtokólikter tyńǵylyqty tekserilýde. Osy tusta polıseıler eskertedi, oqıǵa ornynan qandaı jaǵdaı bolsa da qashyp ketýge bolmaıdy.
Sonymen qatar jol erejesin muqııat saqtaý mańyzdy. Atalǵan jaıtqa sáıkes siz qandaı-da bir málimet bilseńiz nemese oqıǵanyń kýágeri bolsańyz polısııanyń “102” nómirine, ne bolmasa Jetisaı APB-nyń kezekshiligine, 87253467020, senim telefonyna, 6-70-07 habarlasyńyz.