BUU-nyń reıtıngine sáıkes Qazaqstan «elektrondy úkimetti» damytý kórsetkishteri boıynsha 193 eldiń ishinde 29-orynǵa taban tiregen. Bul jóninde Memlekettik qyzmet isteri agenttiginde ótken brıfıngte Memlekettik kórsetiletin qyzmetter departamentiniń dırektory Ildar Úısimbaev málimdedi.
«Memlekettik qyzmet kórsetýdi baqylaý – qyzmetterdiń halyqqa qoljetimdiligi» taqyrybynda ótken brıfıng barysynda agenttiktiń ótken jylǵy jumysy qorytyndylanyp, memlekettik qyzmet kórsetýdi jetildirý máseleleri qaraldy. Halyqqa sapaly qyzmet kórsetý qyzmettiń basty baǵyty bolyp qalatynyn atap ótken departament dırektory sońǵy úsh jylda elektrondy nysanda kórsetiletin qyzmetter úlesiniń 53-ten 82 paıyzǵa óskenin jetkizdi.
О́tken jyly osy mekemeniń atyna halyqtan 1,5 myńǵa jýyq ótinish kelip tússe, onyń basym kópshiligi jer qatynastary máselelerine qatysty bolyp otyr. Áleýmettik, sáýlet jáne qala qurylysy salalarynda memlekettik qyzmetshilerdiń is-áreketterine qatysty túsetin aryz-shaǵymdar da az emes.
Agenttik ókili kelip túsken shaǵymdardyń 36 paıyzy (520 shaǵym) jergilikti organdar qyzmetkerleriniń «enshisinde» ekenin alǵa tartty. Osyǵan oraı, jeke jáne zańdy tulǵalardyń shaǵymdary negizinde 266 jospardan tys tekserý júrgizilip, qyzmet alýshylardyń quqyqtary qalpyna keltirilgen.
«Halyqtan túsken shaǵymdardy qaraý qorytyndysy boıynsha memlekettik organdar men olardyń vedomstvolyq baǵynysty mekemeleriniń 207 qyzmetkeri túrli tártiptik jaýapkershilikke, 33 laýazymdy tulǵa Ákimshilik quqyq buzýshylyq týraly kodekstiń 465-baby boıynsha ákimshilik jaýapkershilikke tartyldy», dep habarlady ol.
I.Úısimbaev barlyq memlekettik organdarǵa tán ári júıeli túrde jiberiletin basty kemshilikterdi atap kórsetti. Onyń eń bastysy jáne eń kóp kezdesetini – qyzmet alýshylardan artyq qujattardy talap etý. Agenttik keltirgen sandarǵa súıensek, ótken jyly memlekettik organdardan 114 myńnan astam zań buzýshylyq anyqtalǵan.
«Quqyq buzýshylyqtyń aldyn alýdyń tıimdi tetikteriniń biri – memlekettik organdarǵa ishki baqylaý júrgizý» dep atap ótken departament dırektory tekserýlerdiń 81 paıyzy aýdandyq jáne aýyldyq okrýgterdiń memlekettik organdarynda júrgizilgenin de jetkizdi.
Máselen, jer qatynastary salasyndaǵy birqatar elektrondy qyzmet qoljetimsiz ekenin aıtqan ol Aýyl sharýashylyǵy mınıstrliginiń 59% qyzmetin jergilikti atqarýshy organdar kórsetetinin, onyń 97 paıyzyn elektrondy nysanǵa aýystyrý kózdelgenin de alǵa tartty.
«Elektrondy úkimet» portaly engizilgeli biraz ýaqyt ótkenimen áli kúnge keı qyzmetter qaǵaz kúıinde qalyp qoıǵan. Qazirgi tańda 54 qyzmet áli portalǵa engizilmegen. Osynyń ózi Memleket basshysynyń qyzmetterdiń 90 paıyzyn elektrondy nysanǵa kóshirý jónindegi tapsyrmasynyń sapaly oryndalýyna kúmán keltiretini sózsiz.
Memlekettik qyzmetterge degen suranys jyl saıyn artyp keledi. Sol sebepti bul baǵyttaǵy sapa men baqylaýǵa erekshe mán berilip otyr. Osyǵan oraı I.Úısimbaev sózin: «Memlekettik qyzmettiń basty mindeti – halyqqa qyzmet etý. Sondyqtan da qyzmet sapasyn jaqsartý, memlekettik qyzmetshiniń etıkalyq deńgeıin kóterý, basty qaǵıdattardyń biri bolyp qala beredi», dep túıindedi.