Árbir bala baqytty ómir súrýge laıyqty. Alańsyz oıyn oınap, túrli úıirmelerge qatysyp, qoǵammen aralasyp ósken bala tez shıryǵady. О́kinishke qaraı, barlyq ata-ananyń birdeı perzentine mundaı múmkindik syılaýǵa shamasy jete bermeıtini taǵy ras. Bir qýantarlyǵy, qaıyrymdy jandardyń qamqorlyǵymen ara-tura ashylyp jatqan áleýmettik ortalyqtar kóptegen otbasyǵa jylylyq syılap otyr.
Almatyda «Shyńǵa órleý» dep atalǵan áleýmettik klýb óz jumysyn bastady. Qalanyń Túrksib aýdanynda ornalasqan shaǵyn ortalyqta az qamtylǵan jáne kóp balaly otbasylardyń balalary qosymsha bilim alyp, túrli shyǵarmashylyq úıirmelerge tegin qatysa alady. Bastaýysh mektep jasyndaǵy 240 órenge shaqtap ashylǵan shyǵarmashylyq úıinde shahmat, mýzyka, bı, beıneleý óneri úıirmeleri jumys isteıdi. Eń qyzyǵy, munda kelgen baldyrǵandarǵa 35-40 jyldyq eńbek ótili bar zeınet jasyndaǵy bilikti muǵalimder tálim beredi.
– Biz eń aldymen balalardyń arman-tilegin oryndap, shyǵarmashylyq qalaýlaryn júzege asyrýǵa kómektesemiz. Balanyń oılaýy oınaý arqyly qalyptasady. Bilikti mamandar ár balamen jeke-dara sóılesip, oı bólisedi. Biz ádeıi ómirlik tájirıbesi baı qart ustazdardy tańdap aldyq. Olar balalarmen óz ata-ájesi sekildi syrlasady, bala janyn jaqsy túsinedi. Áleýmettik jobanyń maqsaty – balalarǵa ulttyq tanymǵa saı tárbıe berý ári jaǵdaıy tómen otbasylardyń balalaryn qoldaý, – deıdi «Shyńǵa órleý» áleýmettik klýbynyń dırektory Shoqan Bolatbekov.
Igi bastamanyń qanat qaǵýyna aýdan ákimdigi men máslıhat depýtattary, sondaı-aq jany jomart azamattar qoldaý kórsetken. Mundaı ortalyqtar búginde Almaty qalasynyń alty aýdanynda jumys isteıdi. «Berseń, balaǵa ber» degen. Aldaǵy ýaqytta da baldyrǵandarǵa qýanysh syılaıtyn ıgi jobalardyń qatary kóbeıe berse quba-qup.
ALMATY