Áleýmettik jelide mektep túlekteri shet tilinen Ulttyq biryńǵaı testileý tapsyrmaıtyny týraly jansaq pikirler tarap jatyr, dep habarlaıdy Egemen.kz
Pikir bildirýshiler mektep túlekteriniń orta bilimdi aıaqtaı salyp, muhıt asyp ketetinin jazdy. Budan ózge, taralyp jatqan málimette jýyrla mektepterde birqatar pándi oqytý toqtatylady dep aıtylǵan.
«Sebebi dene shynyqtyrý páni – Qazaqstannan qalaı qashýdy, geografııa páni – qaı elge qashýǵa bolatynyn, al tarıh páni elden nelikten qashý kerektigin úıretedi. Árıne bul ázil ekeni anyq, biraq adamdardyń kóbi muny shynaıy aqparat retinde qabyldaǵan», deıdi jeli qoldanýshylary.
Stopfake.kz saıty málim etkendeı, Qazaqstanda UBT-daǵy beıindik pánder tiziminen shet tilderin jáne basqa da pánderdi alyp tastaý josparlanbaǵan.
«UBT-dan shet tilin jáne basqa da pánderdi alyp tastaý týraly áleýmettik jeliler men messendjerlerde taratylǵan aqparat shyndyqqa sáıkes kelmeıdi. Resmı derekkózderden taraǵan aqparatty paıdalanýyńyzdy suraımyz» delingen Ulttyq testileý ortalyǵynyń Instagram-daǵy resmı paraqshasynda.
«Al ázil – reseılik bloger Vera Afanasevanyń shet tilin biryńǵaı memlekettik emtıhannan (UBT analogy) alyp tastaý týraly jańalyq boıynsha jazǵan postynan alynǵan kalka. Reseı Bilim mınıstrligi ústimizdegi jyldyń qańtarynda mindetti biryńǵaı memlekettik emtıhannan shet tilin alyp tastaý týraly sheshim qabyldaǵan bolatyn», dep naqtylady Stopfake.kz.