Senatta Konstıtýsııalyq zańnama, sot júıesi jáne quqyq qorǵaý organdary komıtetiniń otyrysy boldy. Onda azamattardyń ómiri men densaýlyǵyna qater tóndiretin esirtki quraldarynyń, psıhotroptyq zattar men olardyń prekýrsorlarynyń, sıntetıkalyq jańa zattardyń zańsyz aınalymyna qarsy is-qımyl, sondaı-aq zańnamany jetildirý sharalary men ózekti máseleler kóterildi.
Elimiz Prezıdentiniń Joldaýynda jynystyq turǵydaǵy zorlyq-zombylyq, pedofılııa, esirtki taratý, adam saýdasy, áıelderge qatysty turmystyq kúsh kórsetý jáne jeke adamǵa, ásirese balalarǵa qatysty basqa da aýyr qylmystar úshin shuǵyl túrde jazany qataıtý qajet ekeni atap ótilgen bolatyn.
Komıtet tóraǵasy Vladımır Volkov óziniń kirispe sózinde búgingi tańda nashaqorlyq problemasy jahandyq turǵyda halyq densaýlyǵyna jáne elimizdiń ulttyq qaýipsizdigine qater tóndiretinin atap ótti.
Kezdesýge qatysýshylar aldynda sóılegen sózinde Ishki ister mınıstriniń orynbasary Qaırat Súntaev jalpy Qazaqstandaǵy esirtki ahýaly kúrdeli ekenin, biraq turaqty bolyp otyrǵanyn atap ótti. Esirtki quqyq buzýshylyqtaryn, onyń ishinde esirtkini ótkizý faktilerin anyqtaý, uıymdasqan esirtki toptaryn joıý jáne sıntetıkalyq psıhotroptyq zattardy alyp qoıý bóliginde oń qozǵalys baıqalady. Sonymen qatar, birqatar ózekti máseleler de bar, olardyń negizgisi nashaqorlyqtyń aldyn alýdy júıeli uıymdastyrý tetiginiń bolmaýy bolyp tabylady.
Ishki ister mınıstrligi esirtkini taratý úshin paıdalanylǵan 1100-den astam ınternet-saıttardy buǵattady. Sondaı-aq osy ýaqyt ishinde esirtki jasaýmen aınalysatyn 8 zerthana joıyldy.
Depýtattar sondaı-aq ulttyq qaýipsizdik komıteti men densaýlyq saqtaý mınıstrliginiń ókilderin tyńdady
"Búgin biz esirtkiniń taralýyna qarsy is-qımyl jasaý tek quqyq qorǵaý organdarynyń ǵana emes, memlekettik organdar men jurtshylyqtyń da kúsh-jigerin talap etetin eleýli problemalardyń biri ekenin aıqyn túsinýge tıispiz", - dedi senator Andreı Lýkın kezdesý sońynda.
Otyrys nátıjesi boıynsha qorytyndy daıyndaldy, ol Úkimet pen memlekettik organdarǵa jiberiletin bolady.