Qys kezeńiniń basynan beri elimiz boıynsha barlyǵy 1 063 daýyldy eskertý jarııalandy, tas jol ýchaskeleri 682 ret jabyldy, júk jáne jolaýshylar avtokólikteri úshin qozǵalysqa 233 ret shekteý engizildi. Ortalyq kommýnıkasııalar qyzmetinde ótken brıfıngte Tótenshe jaǵdaılar mınıstri Iýrıı Ilın sońǵy statıstıkamen bólisti, dep habarlaıdy Egemen.kz.
«Qutqarý bólimsheleri ózara is-qımyl jasaıtyn qyzmettermen birlesip 1242 adamdy, onyń ishinde 74 balany qutqardy jáne evakýasııalady. 97 jylytý pýnkti iske qosyldy, 439 birlik tehnıka shyǵaryldy. Avarııalyq-qutqarý jumystaryna TJM, IIM, JAO jáne jol qyzmetteriniń bólimsheleri tartyldy – 5 myńnan asa adam», - dedi vedomstvo basshysy.
Sondaı-aq, onyń aıtýynsha, qar qursaýynda qalatyn kólikter sany aıtarlyqtaı azaıǵan. Munyń bári ýaqtyly eskertýdiń arqasynda múmkin boldy. Tótenshe jaǵdaılar men oqıǵalar qaýpi týraly halyqty eskertý maqsatynda azamattardyń uıaly telefondaryna aýa raıynyń nasharlaýy týraly 3 708 SMS-habarlama jiberildi. «Dármen» mobıldi qosymshasy arqyly turǵyndarǵa 1 057 habarlama jiberildi.
«Degenmen, men keltirip ótken faktiler adamdardyń TJ qaýpiniń bolýy, sıklondardyń oryn alýy múmkin ekendigi týraly habarlamalardy muqııat tyńdamaıtynyn kórsetedi, tıisinshe óz ómirlerine qater tóndirip, jolǵa shyǵady, bul qutqarý jumystaryn júrgizýge ákeledi. О́tken aptada aýa raıy qolaısyz boldy, avtomobıl joldarynyń kóp bóligi jabyldy jáne qazirgi kezde 9 aımaq boıynsha daýyldy eskertý aldyq, 3 óńir aýmaǵynda jol ýchaskeleri jabyldy. Azamattarymyzdan joldardyń jabylýy týraly aldyn ala jiberilgen eskertýlerdi elep, respýblıkalyq jáne oblystyq mańyzy bar joldarda ornatylǵan blokposttardy aınalyp ótýge tyryspaýlaryn suraımyn», - dedi eldiń bas qutqarýshysy.
Sınoptıkterdiń boljamynsha, taıaý kúnderi Qazaqstannyń ortalyq bóligine jańa sıklon jaqyndaıdy, kún jaýyn-shashyndy bolady, jeldiń jyldamdyǵy artady, tıisinshe qar qursaýy týyndaýy yqtımal.