Prezıdent Qasym-Jomart Toqaev barsha áıelder qaýymyn Halyqaralyq áıelder kúnimen quttyqtady. Egemen.kz quttyqtaýdyń tolyq mátinin jarııalaıdy.
Qurmetti hanymdar!
Barshańyzdy Halyqaralyq áıelder kúnimen shyn júrekten quttyqtaımyn!
Kóktemniń shýaqty merekesi qashanda júregimizdi súıispenshilik pen izgilikke, meıirim men shapaǵatqa bóleıdi.
Biz jyl saıyn osy kúni adamzatqa ásemdik syılaıtyn áıelder qaýymyna yqylas-iltıpatymyzdy bildirip, aq tilek arnaýǵa asyǵamyz. Sizderdiń memleket jáne qoǵam ómirinde alatyn oryndaryńyz aıryqsha. «Áıel bir qolymen besikti terbetse, ekinshi qolymen álemdi terbetedi» degen naqyl sóz beker aıtylmaǵan.
Elimiz áıelderdiń áleýetin tolyq tanytýyna jol ashyp, olardyń quqyǵyn qorǵaýǵa jáne turmys jaǵdaıyn jaqsartýǵa basa mán beredi. Memlekettiń júıeli qoldaý kórsetýiniń arqasynda qyz-kelinshekterdiń ekonomıkadaǵy, saıasat pen qoǵamdyq qyzmettegi róli jyl ótken saıyn arta túsýde.
Táýelsizdik kezeńinde áıelderdiń túrli salada tolaǵaı tabysqa jetkenine bárimiz kýámiz. Sizderdiń jetistikterińiz jurtty jigerlendirip, jańa bıikterge jeteleıdi, jastarǵa úlgi-ónege bolady.
Árqaısyńyzdyń belsendi azamattyq ustanymdaryńyz qoǵamdaǵy kóptegen ózekti máseleni utymdy sheshýge jáne elimizdi jan-jaqty damytýǵa yqpal etedi.
Qazaqstan áıelderiniń aqyl-parasaty, erik-jigeri men jasampazdyǵy barlyq qıyndyqty eńserip, syn-qaterlerge tótep berýimizge septigin tıgizýde.
Barshańyzǵa zor densaýlyq pen baq-bereke tileımin!