Elimizde bıznes bastaýǵa yntalandyratyn memlekettik baǵdarlamalar men granttar bar ekeni belgili. Adamdar osy jaıly estigenimen, shynaıy iske kelgende kúmándanyp ta jatady. Almaty qalalyq kásipkerler palatasynyń basshysy Aıtýar Qoshmambetovtiń aıtýynsha, memleket grantyn alyp, jeke kásip bastaýǵa múmkindik mol.
– Eger taýar satsańyz, taýar qaıdan keledi, ony qalaı qabyldaý, rásimdeý, satý, qaıda saqtaý qajettigin bilýińiz kerek. Osy prosesterdiń bárin ıgerip, barlyq suraq jaýabyn bilgen soń, qyzmetińizdi bólip, kásibı mamandardy jaldaı alasyz, – deıdi A.Qoshmambetov.
Palata basshysynyń sózinshe, árbir baǵyt boıynsha naqty oqý kýrstary bar. Máselen, kásipker SMM nemese býhgalterlik eseptilikti bilse, Atameken Academy portalynan oqýǵa qatysýǵa bolady.
– Budan bólek, «Bastaý Bıznes» arnaıy baǵdarlamasy bar. Úsh apta boıy tyńdaýshy kásipkerlik negizderin oqıdy, sodan keıin 200 AEK kóleminde grant nemese jyldyq 6 paıyzben nesıe alýǵa múmkindigi bolady. Sonymen qatar 5 mln teńgege deıin ınnovasııalyq grant alýǵa da múmkindik berilgen, – deıdi palata basshysy.
2021 jyly «Bastaý Bıznes» boıynsha Almatyda 2 myń adamdy oqytý josparlanyp otyr. Sonymen qatar quny 200 AEK (583 myń teńge) bolatyn 1 myń grant qarastyrylǵan. Bul jobaǵa qatysyp, kásipkerlik negizin ıgergisi kelgen árbir azamat jeke kýáligin alyp jumyspen qamtý ortalyǵyna barýy shart.
Qalalyq jumyspen qamtý ortalyǵynyń dırektory Dılıara Imanqulovanyń aıtýynsha, 2020 jyly shaharda 34 855 adam jumysqa turǵan. Onyń 10 myńnan astamy «Jumyspen qamtýdyń jol kartasy – 2020» arqyly kásip tapqan. Ásirese, IT salasynda suranys artyp keledi. 2021 jyly 20 myńnan astam adamdy jumysqa ornalastyrý josparlanyp otyr.
ALMATY