Nur-Sultan qalasynyń bas memlekettik sanıtarlyq dárigeri Sarhat Beısenova COVID-19 ınfeksııasynyń juqtyrý kórsetkishi artqanyn málim etti, dep habarlaıdy Egemen.kz qala ákimdiginiń resmı saıtyna silteme jasap.
«Demalys, mereke kúnderi de, basqa kúnderi de monıtorıngtik toptardyń jumysy kúsheıtiletin bolady. Nysan ıeleri koronavırýstyń aýyrlyǵyna mán berýi kerek. Biz jumys ýaqytyn uzarttyq, sondyqtan jumys kestesin buzbaýdy, sol sııaqty sanıtarlyq normalardy tolyqtaı saqtaýdy talap etemiz. Nemquraıly qaraǵan kásipkerler jaýapkershilikke tartylady. Qala turǵyndarynyń densaýlyǵy úshin barlyq sharalar qabyldanyp jatyr», dedi Sarhat Beısenova.
Budan soń ol sońǵy táýlikte ınfeksııanyń 112 jaǵdaıy tirkelgenin jáne 110 oshaqtyń anyqtalǵanyn aıryqsha atap ótti.
«Jyl basynan beri elordada COVID-19-ben 7603 adam juqtyrdy. Onyń ishinde qańtarda – 3763, aqpanda – 2811 jáne naýryzda – 1029. Sondaı-aq naýqastarmen baılanysta bolǵan adamdardyń úles salmaǵy aqpan aıyndaǵy 45%-dan naýryz aıynda 49 %-ǵa deıin óskeni baıqalady, bul úı oshaqtarynda bolǵan adamdardyń aldyn alý sharalaryn saqtamaıtyndyǵyn rastaıdy», dedi elordanyń bas memlekettik sanıtarlyq dárigeri.
Sóz arasynda qalada 912 úı oshaǵy bar ekenin, onda 2500 baılanysta bolǵan adam medısınalyq baqylaýda turǵanyn aıtyp ótti.
«Búginde Nur-Sultan qalasynda pılottyq jobaǵa 36 kásipkerlik nysan qatysýda. Bul joba «Ashyq» pılottyq jobasyna qatysatyn obektilerge kirgen kezde kelýshiniń COVID mártebesin anyqtaýǵa múmkindik beredi, ıaǵnı tek úıde ózin-ózi oqshaýlaý rejımin buzatyn adamdardy anyqtaýǵa baǵyttalǵan», dedi ol.