Taldyqorǵan qalasynyń ákimdigi jelidegi resmı paraqshasynda «Egemen Qazaqstan» gazetinde jarııalanǵan maqalaǵa jaýap berdi, dep habarlaıdy Egemen.kz
«Egemen Qazaqstan» gazetiniń №25 (30004) sanynda «Aqyndy eli elemese, sol qaıǵy...» atty maqala jarııalanyp, jyr juldyzy Jumataı Jaqypbaevqa ózi týyp-ósken Taldyqorǵan qalasynan kóshe jáne kitaphananyń atyn berý jaıly másele qozǵaǵan bolatynbyz. Nátıjesinde, Taldyqorǵan qalasy ákiminiń orynbasary S.Arzanbekova Almaty oblystyq tilderdi damytý jónindegi basqarmasynyń basshysy B.Kerimbekke aqynǵa kóshe berý týraly jumystar júrgizip jatqanyn habarlaǵan. Ol hatty oqyp, kóńilimizde kópten júrgen túıtkildiń sheshimi tabylǵanyna qýanǵanbyz. Áıtse de, Taldyqorǵan qalasy ákimdiginiń resmı ınstagram paraqshasynda (taldykorganakimat) Jumataı Jaqypbaevtyń sýretin salyp, maqalamyzǵa jaýap retinde qazaqtyń aıaýly aqyny Ǵalı Ormanovqa kóshe berý týraly usynys hat túspegeni aıtylǵan. Iаkı, qala ákimdigi Jumataı Jaqypbaev pen Ǵalı Ormanovty ajyrata almaı otyr. Mátinde bylaı delingen:
«Taldyqorǵan qalasynyń ákimdigi «Egemen Qazaqstan» gazetindegi «Aqyndy eli elemese, sol qaıǵy...» atty basylymǵa jaýap retinde kelesini habarlaıdy.Taldyqorǵan qalasynyń ákimdigi búgingi kúnge deıin «Taldyqorǵan qalasyndaǵy №4 orta mektepke belgili aqyn Ǵalı Ormanovtyń esimin berý týraly» resmı usynys haty túspegenin jáne usynys túsken jaǵdaıda qoldanystaǵy zańnama talaptaryna saı tıisti onamastıka komıssııasynyń qaraýyna joldanatyndyǵyn habarlaıdy».
Taldyqorǵan qalasynyń ákimdigi oblys basshysy Amandyq Batalovtyń tapsyrmasyn áli de tolyq túsinbegen syńaıly. Qazaq ádebıetiniń alyp tulǵalary Ǵalı Ormanov pen Jumataı Jaqypbaevtyń kim ekenin bilmeıtin qala ákimdigi osylaı uıatqa qalyp otyr. Sonda Taldyqorǵan qala ákimi orynbasarynyń sózi jalǵan bolǵany ma?
Al Almaty oblystyq mádenıet, arhıvter jáne qujattama basqarmasy V.Maıakovskıı atyndaǵy qalalyq ortalyq kitaphanasyna qazaqtyń aıtóbel aqyny Jumataı Jaqypbaevtyń esimi berilse degen aqyn-jazýshylardyń usynysyna áli resmı jaýap qatqan joq.