Májilistiń Áleýmettik-mádenı damý komıtetiniń uıymdastyrýymen «Tehnıkalyq jáne kásiptik bilim berý júıesin damytýdyń ózekti máseleleri: bilim berý prosesin jańartý jáne kolledjderdi materıaldyq-tehnıkalyq jaraqtandyrý» atty beınekonferensııa formatynda keńeıtilgen taqyryptyq otyrys ótti, dep habarlaıdy Egemen.kz Májilistiń baspasóz qyzmetine silteme jasap.
Is-sharany ashqan Májilisi Tóraǵasynyń orynbasary Balaım Kesebaeva qazirgi ýaqytta tehnıkalyq jáne kásiptik bilim berý kadrlaryn, NEET sanatyndaǵy jastardy, az qamtylǵan, kóp balaly otbasylardan shyqqan balalardy jáne aýyl jastaryn daıarlaýǵa 2020-2021 jyldarǵa arnalǵan memlekettik bilim berý tapsyrysyn ulǵaıtý jónindegi Jol kartasy iske asyrylyp jatqanyn aıta kelip: «Nur Otan» partııasynyń saılaýaldy baǵdarlamasy aıasynda «О́zgerister joly: ár azamatqa laıyqty ómir!» 2025 jylǵa qaraı barlyq tilek bildirýshilerdi aqysyz tehnıkalyq jáne kásiptik bilim berýmen qamtý 100%-ǵa jetý qarastyrylǵan. Bul úshin respýblıkalyq bıýdjetten qosymsha 50 myń orynǵa memlekettik bilim berý tapsyrysyn ulǵaıtýǵa qarajat kózdelip otyr. Bul sharalar negizgi mektepten keıin jumysshy mamandyqtarǵa ǵana emes, orta býyn mamandyqtaryna qoljetimdilikti qamtamasyz etýge, halyqtyń áleýmettik osal sanattaryndaǵy balalardyń mamandyq alýyna múmkindik beredi», dedi vıse-spıker.
Otyrysqa Májilis depýtattary, Bilim jáne ǵylym vıse-mınıstri B.Asylova, Eńbek jáne halyqty áleýmettik qorǵaý vıse-mınıstri E.Ospanov, Densaýlyq saqtaý vıse-mınıstri A.Ǵınııat, oblystar jáne respýblıkalyq mańyzy bar Nur-Sultan, Almaty jáne Shymkent qalalary ákimderiniń orynbasarlary, «Atameken» Ulttyq kásipkerler palatasynyń, kolledjderdiń, úkimettik emes uıymdardyń jáne BAQ ókilderi qatysty.
Sonymen qatar keńeıtilgen taqyryptyq otyrysta eldegi tehnıkalyq jáne kásiptik bilim berý júıesiniń aǵymdaǵy jaı-kúıi, damytýdyń ózekti máseleleri, sondaı-aq olardy odan ári sheshý joldary jan-jaqty talqylandy.
Aıta ketý kerek, búgingi tańda elimizde tehnıkalyq jáne kásiptik bilim berý júıesiniń jan-jaqty damýyna erekshe nazar aýdarylýda. 2017 jaldan bastap Qazaqstan Respýblıkasynyń Tuńǵysh Prezıdenti-Elbasy Nursultan Ábishuly Nazarbaevtyń bastamasymen «Barshaǵa arnalǵan tegin kásiptik-tehnıkalyq bilim berý» jobasy iske asyrylýda. Osy joba aıasynda jyl saıyn 21 myń jas jumysshy mamandyqtaryn ıegerýde.
Atalǵan jobamen «Eńbek» memlekettik baǵdarlamasymen 2017 jyldan bastap 300 myńnan astam adam qamtyldy. Olardyń 80%-y halyqtyń áleýmettik osal toptarynan, NEET sanatyndaǵy jastar úlesiniń deńgeıi 9,5%-dan (2016 j.) 7%-ǵa deıin (2019 j.) tómendedi. Memleket basshysy Qasym-Jomart Toqaev Ulttyq qoǵamdyq senim keńesiniń úshinshi otyrysynda tehnıkalyq jáne kásiptik bilim berýde akademııalyq derbestikti engizý, jan basyna shaqqandaǵy qarjylandyrýdy jetildirý eńbek naryǵynyń bolashaǵyn eskerý qajettigine nazar aýdardy.
Osyǵan oraı, «TjKB bar kadrlardy, onyń ishinde NEET sanatyndaǵy jastardy, az qamtylǵan, kóp balaly otbasylardan shyqqan balalardy jáne aýyl jastaryn daıarlaýǵa 2020-2021 jyldarǵa arnalǵan memlekettik bilim berý tapsyrysyn ulǵaıtý jónindegi» Jol kartasy iske asyrylýda. Onyń aıasynda memlekettik tapsyrysty jergilikti bıýdjetten jyl saıyn 2% -ǵa ulǵaıtý josparlanyp otyr.
Bıyldan bastap TjKB-ǵa kolledjderge qabyldaýdyń jańa formaty «Aqsha stýdentpen» qaǵıdaty boıynsha engizilýde. Osyǵan baılanysty, kolledjderge memlekettik tapsyrys boıynsha oqýǵa qabyldaý bilim týraly (attestat, kýálik) qujattyń mindetti jáne beıindik pánderiniń baǵalary boıynsha júzege asyrylady.
Otyrysty qorytyndylaǵan Áleýmettik-mádenı damý komıtetiniń tóraıymy J. Nurmanbetova jıyndaı aıtylǵan usynys-pikirler negizinde usynymdar ázirlenip, Úkimetke joldanatynyn aıtty.