Bul týraly Atyraý oblysy boıynsha qylmystyq-atqarý júıesi departamentiniń baspasóz qyzmetinen málim etti, dep habarlaıdy Egemen.kz.
Rabıǵa esimdi 63 jastaǵy áıel Taraz qalasynda esirtki satýmen aınalysqan. Ony polısııa qyzmetkerleri 2010 jyly geroın satý kezinde ustaǵan. Sot úkimimen 15 jylǵa sottalyp, múlki tárkilengen. Jazasyn Qazaqstannyń ózge túrmelerinde ótep, keıin Atyraýdaǵy ÝG-157/11 mekemesine aýystyrylypty.
«Alaıda, QR Qylmystyq-prosessýaldyq Kodeksine sáıkes jazasyn óteýshi 2021 jyldyń naýryz aıynda merziminen buryn shartty túrde bostandyqqa shyqty. Oǵan qajetti quqyqtyq-áleýmettik kómek kórsetilip, kútip alýǵa týystary shaqyryldy. Jazasyn óteý kezinde tártipti bolyp, quqyq buzýshylyqtarmen kózge túsken joq. Ol týraly málimet Jambyl oblysy boıynsha QAJD jiberildi» deıdi ÝG-157/11 mekemesi bastyǵynyń orynbasary Medet Adjıkýlov.
Shartty túrde bostandyqqa shyqqan 63 jastaǵy Rabıǵa Tarazdaǵy úıine oralyp, týystarymen kezdespek. Sodan keıin túrmede bolǵan kezde ómirden ótken týystarynyń rýhyna quran baǵyshtaýdy kózdep otyr.
«Túrmede ótken 11 jylda kóp nárseni joǵalttym. Jasaǵan qylmysyma ókinýmen boldym. Qartaıǵan kezimde nemere-shóberemdi oınatýdyń ornyna, qylmys jasadym. Mekeme qyzmetkerleri meni tárbıelep, durys jolǵa saldy. Qalǵan ómirimdi tynysh ótkizgim keledi» deıdi Rabıǵa.