«Qazposhta» AQ pochta-logıstıkalyq qyzmet kórsetý servısin jetildirýde. Ulttyq poshta baılanysynyń operatory halyqaralyq poshta jóneltilimderi men júkterdi kedendik resimdeý jónindegi qyzmetti iske qosady. Keden ókili mártebesin alý «bir tereze» qaǵıdasy boıynsha keshendi qyzmet kórsetýge múmkindik beredi, dep habarlaıdy Egemen.kz.
«Bıyl bizdiń kompanııa kedendik ókilder tizilimine engizildi. Bul bizdiń pochta-logıstıkalyq qyzmetti kórsetýdiń tolyqqandy modelin qurý jolyndaǵy qadamdarymyzdyń biri jáne onyń mýltıplıkatıvtik nátıjesi bar. Osylaısha biz elimizdiń turǵyndary úshin qyzmetter spektrin keńeıtemiz. Jetkizý men saqtaýdan bastap tapsyrystardy basqarý men qozǵalysty qadaǵalaýǵa deıin tolyqqandy servıstik modeldi usynamyz», dep «Qazposhta» AQ Logıstıkalyq servıs jónindegi basqarýshy dırektory Asqar Ábdikárimov atap ótti.
Búginde halyqaralyq poshta jóneltilimderi men júkterdi kedendik resimdeý boıynsha qyzmetter Nur-Sultan jáne Almaty qalalarynda qoljetimdi bolmaq. Bolashaqta qyzmet kórsetý aıasyn keńeıtý jáne barlyq oblys ortalyqtarynda kedendik resimdeýdi usyný josparlanýda.
«Kedendik ókil mártebesi bizdiń klıentterimizge kedendik shekara arqyly ótkiziletin halyqaralyq pochta jóneltilimderi men júkterdi resimdeý boıynsha keshendi qyzmet kórsetýge múmkindik beredi. Bizdiń mamandar tıisti oqýdan ótti. Logıstıkalyq prosesterdi ońtaılandyryp jáne jedeldetip, biz qyzmetterdiń barlyq spektrin usyný negizinde óńirlik saıasatty damytamyz», dedi ol.
Sondaı-aq Qazposhta ýákiletti ekonomıkalyq operator mártebesin alý boıynsha jumys júrgizýde, ol EAEO-ǵa kiretin memleketterdiń shekaralaryn kesip ótý kezinde júkterdi resimdeýdiń ońtaılandyrylǵan tártibin paıdalanýǵa múmkindik beredi.