Petropavldyq polıseıler esirtki saýdasyn uıymdastyrǵan kúdiktiden 560-tan astam doza esirtki aldy, dep habarlaıdy Polisia.kz.
Esh jerde jumys istemeıtin 29 jastaǵy petropavldyq polıseılerdiń nazaryna úsh aı buryn ilikken. Jedel ýákilder osy ýaqyt aralyǵynda jas jigittiń esirtki satýǵa qatysy bar-joǵyn anyqtaý úshin aýqymdy jumystar júrgizdi. 24 naýryz kúni Petropavl qalasynyń PB EQQIB qyzmetkerleri ony turǵylyqty mekenjaıynda ustady. Páterden ósimdik tektes zattar salynǵan paketter men oramalar alyndy. Saraptama qorytyndysyna sáıkes alynǵan zattar – marıhýana jáne gashısh bolyp tabylady.
Odan 1,5 keliden astam marıhýana, 870 gramm gashısh, 3 uıaly telefon, aqsha qarajattary men bank kartalary alyndy. Sol kúni atalǵan azamattan kishigirim partııalarmen esirtki satyp alyp, qala kóshelerinde saýdalaǵan onyń 24-26 jas aralyǵyndaǵy tórt sybaılasy ustaldy.
Esirtki satýdy uıymdastyrdy degen kúdikpen ustalǵan azamat ýaqytsha ustaý ızolıatoryna qamaldy. QR Qylmystyq kodeksiniń 297-babymen (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) sotqa deıingi tergeý júrgizilýde. –
Talaıdyń taǵdyryn tálkekke salatyn ýdy kúdiktiniń ózi tatyp kórmegen. Kúdiktini ustaýmen qatar, ony taratý tizbegin anyqtaý mańyzdy boldy. Esirtki satqany úshin 20 jyl merzimge deıin bas bostandyǵynan aıyrý túrindegi qylmystyq jaýapkershilik qarastyrylatynyn eske salamyz, – deıdi Petropavl qalasynyń PB bastyǵy Jandos Muqatov.