Baızaq aýdandyq tarıhı ólketaný mýzeıinde úsh myńnan asa jádiger bar. Sondaǵy kitaptar qorynda tirkelgen myna bir «qyzyl kitap» ózinshe erekshe. Erekshe deıtinimiz – ol ári qundy, ári eski dúnıe.
1937-38 jyldary baspadan shyqqan kitapta áıgili jyrshy Jambyl Jabaevtyń óleńderi toptastyrylǵan. Aıta keterligi, uly aqynnyń «Lenın mavzoleıinde», «Orden alǵanda», «Halyqtan sálem», «Odaqtas», «12 dekabr», «Ulyma», «Balalarǵa», «Alataý» jáne taǵy basqa shyǵarmalary latyn áripinde jazylǵan. Kitap mýzeı kelýshilerine osynysymen de qyzyq.
Qazaq halyq poezııasynyń áıgili tulǵasy, óleń sózdiń dúldúli Jambyl Jabaevtyń týǵanyna bıyl 175 jyl. El ómirindegi jetistik pen jańǵyrýlardy, jeńis pen erlikti aıryqsha shabytpen jyrlaǵan aqynnyń óleńderi aǵylshyn, bolgar, cheh jáne álemniń basqa tilderine aýdarylǵan deıtin bolsaq, latyn áripinde jarııalanǵan osynaý erekshe kitapty mýzeıge aýdanymyzǵa qarasty Jańaturmys aýyldyq okrýgi Aqsholaq orta mektebiniń muǵalimi Rahmanov Tóljan Tólegenuly syıǵa bergen.
«Kitap – sarqylmas rýhanı qazyna. Jaqsy kitap jan dúnıemizdi nurlandyryp, júregimizdi aınadaı jarqyratady. Al mynadaı uly tulǵanyń týyndysy tek meniń úıimdegi sórede emes, kópshilik kóretin jerde turýy tıis dep sheship, aýdandyq mýzeıge tabystaǵan bolatynmyn. Ásirese, keıingi jas urpaq kóp kitap oqysa eken», deıdi ulaǵatty ustaz.
Aıdana ShOTBASOVA,
Baızaq aýdandyq tarıhı-ólketaný mýzeıiniń qor saqtaýshysy
Jambyl oblysy