Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi men Nur-Sultan qalasyna jumys saparymen kelgen Reseı Federasııasynyń Syrtqy ister mınıstri Sergeı Lavrov ekijaqty kelissózder ótkizdi.
Mınıstrler saıası jáne ekonomıkalyq salalardaǵy, tranzıt-kóliktik, energetıka, áskerı-tehnıkalyq salalardaǵy Qazaqstan-Reseı yntymaqtastyǵynyń aǵymdaǵy jaı-kúıi men damý perspektıvalaryn, sondaı-aq TMD, EAEO, UQShU, ShYU jáne AО́SShK sııaqty halyqaralyq uıymdar men óńirlik ıntegrasııalyq birlestikter sheńberindegi eki eldiń ózara is-qımylyn talqylady.
M.Tileýberdi Reseı baǵyty Qazaqstannyń syrtqy saıasatynyń mańyzdy basymdyǵy bolyp qala beretinin jáne eki jaqty qarym-qatynastarymyzda sheshilmegen máseleler joq ekenin atap ótti. Qazaqstanda eki el arasyndaǵy odaqtastyq qarym-qatynastar joǵary baǵalanady.
Taraptar halyqaralyq kún tártibiniń ózekti máseleleri, sonyń ishinde Ortalyq Azııada, Ońtústik Kavkazda, Taıaý Shyǵysta óńirlik turaqtylyq pen qaýipsizdikti qamtamasyz etý boıynsha pikir almasty.
Sonymen qatar asa joǵary jáne joǵarǵy deńgeıdegi is-sharalardy daıyndaý máseleleri, onyń ishinde eki memleket basshylarynyń qatysýymen Kókshetaý qalasynda ótetin Qazaqstan men Reseıdiń XVII aımaqaralyq yntymaqtastyq forýmy qarastyryldy.
Sapar baǵdarlamasy aıasynda Reseı Federasııasynyń Syrtqy ister mınıstri Qazaqstan Respýblıkasy Prezıdenti Qasym-Jomart Toqaevtyń qabyldaýynda bolady dep kútilýde.