Búgin Úkimet otyrysynda QR Energetıka mınıstri Nurlan Noǵaev 2021 jylǵy qańtar-naýryz aılarynyń qorytyndysy boıynsha otyn-energetıka kesheniniń aǵymdaǵy jaǵdaıy týraly baıandady, dep habarlaıdy Egemen.kz.
«Esepti munaı jáne kondensat óndirý kólemi 21,1 mln tonnaǵa jetti, bıylǵy qańtar-naýryz aılarynyń josparyna 100 paıyzdy qurady. Sonyń ishinde, munaı-gaz salasyndaǵy iri kompanııalar boıynsha kórsetkishter tómendegideı: Teńiz jobasynda atalǵan kezeńde 6,7 mln tonna munaı óndirildi, bul jospar 100% oryndaldy. Soltústik Kaspıı jobasy – Qashaǵanda munaı óndirý kólemi – 3,7 mln tonna boldy, ıaǵnı qańtar-naýryz aılarynyń jospary 100% oryndaldy. Qarashyǵanaq jobasynyń kórsetkishi 3,1 mln tonnany qurap otyr», dedi mınıstr.
Onyń aıtýynsha, esepti kezeń ishinde 16,6 mln tonna munaı eksporttaldy, aǵymdaǵy jylǵy qańtar-naýryz aılarynyń jospary 100% oryndalǵan. «2021 jylǵy 1 sáýirdegi OPEK + otyrysynyń qorytyndysy boıynsha munaı óndirý kólemi kezeń-kezeńmen, sáıkesinshe mamyr, maýsym jáne shilde aılarynda táýligine 6 myń barrelge ulǵaıtylmaq», dedi N. Noǵaev.