Qazaqstannyń qos grek-rım kúresi sheberleri Almatyda ótip jatqan Azııa chempıonatyn qorytyndylady. Búgin qorjynymyzǵa úsh medal tústi, dep habarlaıdy Egemen.kz.
Ońtústik Koreıanyń ókili Kım Seýnghak pen ıraktyq Karrar Abas Albeedhanǵa san soqtyrǵan 60 kılo salmaqtaǵy Aıdos Sultanǵalı fınalda ırandyq Mehdı Mohsen Nedjadpen kúsh synasty. Bul básekeniń alǵashqy jartysy Parsy eli ókiliniń paıdasyna sheshildi. Al úzilisten keıin «qaharyna» mingen qandasymyz kesek ádis jasap, alǵa shyqty. Esep – 8:4. Bul esep kezdesýdiń sońyna deıin saqtaldy.
Bastapqy básekelerde ózbekstandyq Mırzobek Rahmatov pen koreıalyq Kım Dohengtyń aıaǵyn kókten keltirip, jartylaı fınalda qyrǵyzstandyq Amantur Isamaılovty jolynan yǵystyrǵan 67 kılo salmaqtaǵy Almat Kebisbaev aqtyq synda japonııalyq Sýshıka Shımoıamadamen sheberlik baıqasty. Báseke barysynda qazaq jigiti qarsylasynan jeti upaı ozyp turǵan edi. Endi bir upaı alsa, jeńis Almattyń enshisine jazylatyn edi. Biraq bári kersinshe boldy. Jankeshtilik tanytqan japon jigiti qazaq sportshysyna jer sıpatyp ketti. Kebisbaevtyń kúmis medaldi qanaǵat tutýdan basqa amaly qalmady.
Al úshinshi oryn úshin talasýǵa tıis qarsylasy boz kilemge shyǵýdan bas tartqandyqtan) qola medal Erulan Ysqaqov (97 kılo tabys etildi. Evgenıı Polıvadov (82 kılo) tórtinshi orynda qalyp qoıdy.
Esterińizge sala keteıik, jarystyń alǵashqy kúni qazaqstandyq balýandar arasynan Sultan Ásetov altyn alsa, Álimhan Syzdyqov kúmispen kúpteldi. Al Demeý Jadyraev qolaǵa qol sozdy.
Osylaısha Azııa chempıonatynda Baqtııar Baıseıitov jetekshilik etetin grek-rım kúresinen Qazaqstannyń quramasy 2 altyn, 2 kúmis jáne 2 qola medal jeńip aldy.