Qazirgi ýaqytta elimizde 2000-ǵa jýyq Qoǵamdyq kelisim keńesi jumys isteıdi. Qazaqstan halqy Assambleıasynyń jáne onyń óńirlik qurylymdarynyń janynan qurylǵan Qoǵamdyq kelisim keńesteri búginde qoǵamdaǵy kókeıkesti máselelerdi talqyǵa salyp, olardyń sheshý joldaryn qarastyryp keledi.
Qoǵamdyq kelisim keńesteriniń músheleri el ishinde bedeli bar, sózi ótimdi tulǵalardyń arasynan saılanady. Olar qoǵamdaǵy tatýlyq pen turaqtylyqtyń saqtalýyna jergilikti bılik ókilderimen birlese qyzmet etýde. Búgingi kúni jergilikti atqarýshy bılik ókilderiniń Qoǵamdyq kelisim keńesterimen sanasatynyn baıqap otyrmyz. Demek, bul olardyń aıtary baryn, halyq atynan sóıleýde, salmaqty oı aıtýda orny bólek ekendigin ańǵartady.
Bizdiń óńirde 1 oblystyq, 10 aýdandyq, 3 qalalyq, 154 aýyldyq okrýg pen 13 iri mekemede barlyǵy 181 Qoǵamdyq kelisim keńesi qurylyp, jumys júrgizýde. Dostyq úıinde oblystyq Qoǵamdyq keńes jáne QHA Qoǵamdyq kelisim keńesi men Analar keńesi birlesip qurǵan 4 top «Biryńǵaı ashyq esik kúni» aıasynda turǵyndardyń ózekti máseleleri boıynsha qabyldaýlar júrgizedi. Atap aıtqanda, kóp balaly otbasylardy turǵyn úımen qamtamasyz etý, joldardy jóndeý, gazdandyrý, kóshelerdi jaryqtandyrý, turǵyn úıler salý úshin jer berý, aıaldamalar salý, kóp balaly, jaǵdaıy tómen, jas otbasylarǵa materıaldyq, áleýmettik kómek berý, aımaqtardy abattandyrý, mektepter úshin kitaptar satyp alý, eldi mekender turǵyndarynyń qaýipsizdigi, qarııalarǵa kómek kórsetý, órtten zardap shekkenderge úıdi jóndeýge qarjylyq kómek kórsetý jáne basqa máseleler sheshimin tapty. Sondaı-aq qalada ınfraqurylym men kommýnaldyq qyzmetterdiń tarıftik saıasatyn júrgizý, aýyldardaǵy emhanalar, kásipkerlikti qoldaý jáne zańsyz tekserýlerden qorǵaý boıynsha jáne janjal jaǵdaılarynyń aldyn alý, daýlardy medıasııa qaǵıdattaryn qoldana otyryp sheshý boıynsha túıtkildi máseleler sheshimin tapty. Qazirgi ýaqytta qoǵamdaǵy turaqtylyqqa asa zor nazar aýdaryp otyrǵan Qoǵamdyq kelisim keńesteri bılik pen turǵyndar arasyndaǵy ámbebap dıalog alańyna aınaldy.
Jasyratyny joq, Qordaı aýdanynda oryn alǵan keleńsiz jaǵdaı bárimizge úlken sabaq boldy. Endigi mindet – osyndaı jaǵdaıǵa jol bermeý. Sondyqtan da Qordaı oqıǵalarynan keıin aýdanda birlesken Qoǵamdyq kelisim keńesi qaıta qurylyp, onyń quramyna óz ortasynda bedeldi jáne kópshilikke aıtary mol, ómirlik baı tájirıbesi bar qoǵamdyq pikir jetekshileri engizildi.
Qazirgi tańda Qordaı, Merki, Shý, Baızaq, Jambyl, Talas, Sarysý aýdandarynda 8 birlesken Qoǵamdyq kelisim keńesi qurylyp, jańa baǵytta jumys atqarýdy belsendi qolǵa aldy. Birlesken qoǵamdyq kelisim keńesteriniń quramyna ardagerler keńesi, mektep dırektorlary, aýyl aqsaqaldary, etnomádenı birlestikter, zııaly qaýym ókilderi, meshit ımamdary engizildi. Bul jumys oblystyń basqa aýdandarynda da júzege asyrylatyn bolady.
Jambyl oblysynyń Sarysý, Talas, Baızaq jáne Merki aýdandarynda QHA-nyń «Qaıyrymdylyq kerýeni» aıasynda oblystyq Qoǵamdyq kelisim keńesiniń «Jergilikti atqarýshy bılik organdary men Qoǵamdyq kelisim keńesiniń qoǵamdyq birlik pen kelisimdi nyǵaıtýdaǵy ózara is-qımyly» taqyrybynda kóshpeli otyrystary ótip, olarda ınfraqurylymdy jaqsartý, jaıylymdyq jer, ulttyq kásip – qolónerdi jańǵyrtý máseleleri boıynsha qoǵamdyq qabyldaýlar uıymdastyryldy.
Sonymen birge «Beıbitshilik pen kelisim» jobasy aıasynda Merki, Shý, Baızaq, Jambyl, Talas, Sarysý aýdandarynda tıisti sala mamandary aýdan turǵyndarymen kezdesip, aımaq turǵyndarynyń máselelerin naqty sheshýdi maqsat etip otyr. Oblys aýdandarynda halyqty tolǵandyratyn máselelerdi anyqtaýǵa, óńirdegi etnosaralyq kelisimdi nyǵaıtýǵa baǵyttalǵan 55 is-shara, áleýmettik saýaldama ótkizildi. Nátıjesinde tıisti memlekettik organdarǵa usynystar jiberildi. Kezdesý barysynda jastar arasyndaǵy jumyssyzdyq, sport jáne mádenı keshenderdiń joqtyǵy, ınternet kúshiniń tómendigi, azyq-túlik baǵasynyń qymbattaýy jáne etnostyq belgisi boıynsha qysym kórsetý syndy máseleler talqylandy.
Sondaı-aq aýdandardaǵy Qoǵamdyq kelisim keńesteriniń keńeıtilgen otyrystary ótip, aýyl jastarynyń quqyqtyq saýatyn arttyrý, patrıottyq sezimderin oıatý, Otan aldyndaǵy áskerı boryshyn óteýge tartý, dinı uıymdar jumysyn qadaǵalaý, bilim alýǵa ártúrli etnos balalarynyń tolyq qamtylýy, jastardyń barlyǵynyń memlekettik tildi meńgerýi sııaqty birqatar másele kóterildi.
Aldaǵy ýaqytta da oblys turǵyndary men jergilikti qoǵamdyq basqarý oryndary arasynda oń baılanysty qamtamasyz etip, qoǵamdaǵy turaqtylyqty, azamattyq tatýlyqty, birlik pen kelisimdi nyǵaıtýda Qoǵamdyq kelisim keńesteriniń róli joǵary bolaryna senimimiz mol.
Bıgeldi TÁJIBAEV,
Qazaqstan halqy Jambyl oblystyq assambleıasynyń Birlesken qoǵamdyq kelisim keńesiniń tóraǵasy