Búgin Halyq Qaharmany Qasym Qaısenovtiń týǵanyna 103 jyl. Osy kúnge oraı jerlesteri batyrdy eske alyp, eskertkishine gúl shoqtaryn qoıdy. Mýzeıine kirip, partızan jazýshynyń paıdalanǵan dúnıelerin qyzyqtady, dep habarlaıdy Egemen.kz.
Aıta keterligi, О́skemendegi «Jastar» saıabaǵyna 2019 jyly Qasym Qaısenovtiń aty berilip, Jeńis dańǵyly boıynda turǵan keýde músini saıabaqtyń etnoaýylyna aýystyrylǵan. Al 2020 jyly sáýlet-etnografııalyq jáne tabıǵı-landshafttyq mýzeı-qoryǵynda «Halyq Qaharmany Qasym Qaısenov jáne maıdanger jazýshylar» atty kórme ashylǵan. Alaıda pandemııaǵa baılanysty mýzeıdiń ashylýyna kóp eshkim kele almaǵan edi. Búgin de uıymdastyrýshylar barynsha sanıtarlyq talaptardy saqtaı otyryp ótkizdi.
Mýzeıdiń kireberisinde Qasym Qaısenovtiń týǵan jeri – Ulan aýdanynyń kórikti tabıǵatynyń sýreti ornalasypty. Bólmelerdiń biri partızan-jazýshynyń ata-anasy turǵan úıdiń úlgisimen jabdyqtalypty. Tórgi bólmede batyrdyń Almatydaǵy úıinen jetkizilgen dúnıeleri qoıylǵan. Tusynda iliýli turǵan kilemi, Abylaıhan men Stalınniń portretteri, jumys ústeli osynda kóshirilipti. Ústeldiń ústinde qoljazbasy da jatyr.
Sonymen qatar jazýshy Ázilhan Nurshaıyqov pen Eset Áýkebaevtyń da buryshy bar.