Bıyl qazaqtyń kórnekti aqyny, Memlekettik syılyqtyń ıegeri Kúlásh Ahmetova 75 jasqa tolyp otyr, dep habarlaıdy Egemen.kz
Aqynnyń ár jyldary «Aq gúlim meniń», «Sen meniń baqytymsyń», «Bulaqtaǵy juldyzdar», «Meıirim», «Japyraq – jazdyń júregi» atty óleńder jınaǵy jaryq kórip, oqyrmannan laıyqty baǵasyn alǵan. Ár kezeńde Kúlásh aqyn týraly Ábdilda Tájibaev, Táken Álimqulov, Jumeken Nájimedenov, Qadyr Myrzalıev, Ábish Kekilbaev sııaqty áıgili tulǵalar joǵary pikir bildirgen.
«Qazaq poezııasynyń aq gúli» atanǵan ardaqty aqyn bul kúnde Taraz qalasynda turady. Jambyl oblysynyń ákimi Berdibek Saparbaev aqyn Kúlásh Ahmetovanyń shańyraǵyna mereıtoıymen arnaıy quttyqtap bardy. Kezdesý barysynda belgili qalamgerge Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn oqyp berdi. Memleket basshysy Qasym-Jomart Kemeluly Kúlásh Ahmetovanyń óleńderiniń ómirsheńdigin atap ótken. Onyń shyǵarmashylyǵyndaǵy lırıkalyq obrazdar jarqyn ári naqty sýrettelip, dúnıedegi qubylystar aqyn kózqarasymen oqyrmandaryn eriksiz baýraıtyndyǵy aıtylǵan. О́z quttyqtaýynda Prezıdent Kúlásh Ahmetovaǵa zor densaýlyq jáne shyǵarmashylyq tabys tilegen. Memleket basshysynyń quttyqtaýyn jetkizgen oblys ákimi aqyndy mereıtoıymen quttyqtap, gúl shoqtaryn tabys etti.
«Sizdiń óleńderińizdi birneshe jas býyn urpaq súıip oqyp, ósti. Shyǵarmashylyǵyńyzdyń negizi adal dostyq pen mahabbat, jomarttyq pen patrıotızm desek, sol arqyly jas urpaqty durys jolǵa tárbıeleýge úles qosyp kelesiz. Sizdiń parasatty poezııańyz arqyly qalyń oqyrman oı túıip, jaqsylyqqa umtylyp, boıyn túzeıdi», dedi Berdibek Saparbaev.
Búginde jetpis bestiń belesine kóterilip otyrǵan Kúlásh Ahmetova 2006 jyly Qazaqstan Respýblıkasy Memlekettik syılyǵynyń laýreaty atandy. Jambyl oblysynyń Qurmetti azamaty, «Qurmet» ordeniniń ıegeri.
Aqynnyń shyǵarmalary álemniń kóptegen tilderine aýdarylǵan. Aqyn mereıtoıyna oraı, jýyrda ǵana Kúlásh Ahmetovanyń jańa bes tomdyq shyǵarmalar jınaǵy jaryq kórip, oqyrmanǵa jol tartty.
Al karantındik shekteýlerge baılanysty mereıtoılyq negizgi sharalar kúz mezgilinde ótedi dep josparlanýda. Soǵan oraı aqynnyń Otan týraly jańa kitaby da jaryq kóredi dep kútilýde. Oǵan elimizdiń ár aımaǵyndaǵy tabıǵattyń sulý kórinisteri sýrettelgen óleńder toptamasy enetin bolady.